Лінкі ўнівэрсальнага доступу

Янукевіч: «Мы хочам сьвята, а ня бойкі на Дзень Волі». Статкевіч: «Гэта праца на раскол»


Намесьнік старшыні Партыі БНФ Аляксей Янукевіч і адзін зь лідэраў Беларускага нацыянальнага кангрэсу Мікола Статкевіч пракамэнтавалі Свабодзе забарону Менгарыканкамам шэсьця і мітынгу 25 сакавіка і падачу новай заяўкі ў Менгарвыканкам на правядзеньне канцэрту і мітынгу.

«Наш выбар дзеля мірнага і годнага адзначэньня 25 сакавіка ў Менску»

Паводле намесьніка старшыні Партыі БНФ Аляксея Янукевіча, ад пачатку стварэньня аргкамітэт падкрэсьліваў, што 25-е сакавіка павінна быць днём нацыянальнай кансалідацыі дзеля абароны і ўмацаваньня беларускай незалежнасьці.

«Важна, каб гэтая кансалідацыя адбылася максымальна шырока ў тым ліку з удзелам уладаў. Сыходзячы са сваіх інтарэсаў улады прапанавалі варыянт правесьці легальна, з гукаўзмацненьнем, у нармальных умовах канцэрт у цэнтры гораду», — кажа палітык.

Аляксей Янукевіч
Аляксей Янукевіч

Паводле Аляксея Янукевіча, шэсьце па праспэкце, па праезнай частцы было б лепей, чым толькі мітынг.

«Але гэта пытаньне палягае ў рэчышчы таго, ці гатовыя мы зрабіць 25 сакавіка сьвятам, ці мы хочам бойку і супрацьстаяньне. Мы цьвёрда трымаемся таго, што нам патрэбна сьвята, легальная магчымасьць сабрацца людзям і адзначыць гэту важную гістарычную дату. І падкрэсьліць нацыянальную кансалідацыю».

Паводле Янукевіча, Партыя БНФ робіць выбар на карысьць дэмакратычнага грамадзтва, а не на «адзінства і згоду ў коле апазыцыйнага балота».

«Мы робім выбар на карысьць кааліцыі, згоды з тым грамадзтвам, інтарэсы якога мы адстойваем і якое нас падтрымлівае. Мы абсалютна сьвядома зрабілі наш выбар на карысьць таго, каб зрабіць усё, што ад нас залежыць, дзеля мірнага і годнага адзначэньня 25 сакавіка ў Менску», — падсумаваў Янукевіч.

«Павінна быць годнае шэсьце па вуліцах сталіцы»

Паводле Міколы Статкеіча, улады «не наважыліся дазволіць нам годна адсьвяткаваць сотую гадавіну беларускай незалежнасьці».

Мікола Статкевіч
Мікола Статкевіч

«У панядзелак (на паседжаньні аргкамітэту сьвяткаваньня 100-годзьдзя БНР — РС) мы дасягнулі супольнай пазыцыі, прагаласавалі, стварылі перамоўную групу. Калі ўлада адмаўляе ў нашай заяўцы, то было б лягічна, каб аргкамітэт сабраўся і выпрацаваў пазыцыю, — сказаў Свабодзе Статкевіч. — Але частка арганізацый падала сваю заяўку. Гэта праца на раскол. Толькі ж аб’ядналіся дзеля гэтага сьвята і тут нейкія сэпаратныя дзеяньні. Шкада, што калегі раскалолі аргкамітэт».

Мікола Статкевіч пажадаў «посьпехаў калегам», якім «можа, і пашэнціць зь іх заяўкай», дадаўшы што заўтра старшыні камісій рады Беларускага нацыянальнага кангрэсу абмяркуюць сытуацыю.

«Але мая пазыцыя застаецца нязьменнай. Недзе за дрэвамі ў парку сьвяткаваць стагодзьдзе незалежнасьці таксама трэба. Але павінна быць годнае шэсьце па вуліцах сталіцы. Я гэтую пазыцыю буду адстойваць. Калі мы гэта рашэньне прымем, то шэсьце адбудзецца ў цэнтры Менска», — сказаў палітык.

Ён пашкадаваў, што апазыцыйныя сілы «адразу пайшлі на кампраміс» і падалі кампрамісную заяўку — да плошчы Свабоды.

«Хаця мабыць лягічна сьвяткаваць на плошчы Незалежнасьці. Будзем думаць пра наш фармат. Але зьвяртацца да ўладаў з заяўкай сэнсу няма».

Частка аргкамітэту — за шэсьце, частка — за канцэрт

28 лютага заяўнікі шэсьця і мітынгу 25 сакавіка, прысьвечаных 100-годзьдзю Беларускай Народнай Рэспублікі, атрымалі адказ зь Менгарвыканкаму. Улады не дазволілі шэсьце з плошчы Якуба Коласа па праезнай частцы праспэкту Незалежнасьці і мітынг-канцэрт на плошчы Свабоды.

Пасьля гэтага частка аргкамітэту — прадстаўнікі БНФ «Адраджэньне», рух «За свабоду», Аб’яднаная грамадзянская партыя, Беларуская сацыял-дэмакратычная партыя (Грамада) і інфармацыйна-асьветніцкая ўстанова Amaroka — падалі ў Менгарвыканкам новую заяўку на правядзеньне ў Дзень Волі мітынгу і канцэрту, прысьвечаных 100-годзьдзю БНР.

Заяўнікі просяць дазволіць збор удзельнікаў каля Вялікага тэатру Беларусі ў Менску 25 сакавіка з 13 да 14 гадзіны, а таксама правядзеньне мітынгу і канцэрту з 14 да 19 гадзіны.

Улады паабяцалі даць адказ на пачатку наступнага тыдня.

26 лютага Менгарвыканкам неафіцыйна прапанаваў арганізатарам сьвяткаваньня 100-годзьдзя БНР зьмяніць яго фармат, адклікаць ранейшую заяўку і замест шэсьця праз цэнтар гораду правесьці мітынг і сьвяточны канцэрт у Купалаўскім парку або каля Опэрнага тэатру.

Прапанова выклікала хвалю дыскусій і абмеркаваньняў на паседжаньні аргкамітэту сьвяткаваньня 100-годзьдзя БНР увечары 27 лютага. Частка ягоных чальцоў выступала за абавязковае традыцыйнае шэсьце на Дзень Волі, а частка за тое, каб не настойваць на шэсьці, калі будзе магчымасьць правесьці сьвяточны мітынг і канцэрт каля Опэрнага тэатру.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG