Апазыцыйны расейскі палітык Аляксей Навальны выдаліў са свайго сайту спасылку, па якой можна было знайсьці матэрыялы расьсьледаваньня пра віцэ-прэм’ера Расеі Сяргея Прыходзьку і мільярдэра Алега Дзерыпаску.
Пра гэта паведаміла выданьне «МБХ медиа». Па словах Навальнага, спасылка мала кім наведваецца, таму што расьсьледаваньне цяпер праглядаюць у асноўным у YouTube. Палітык абвясьціў, што пасьля закрыцьця ранейшай спасылкі ўся інфармацыя пераносіцца на вонкавы рэсурс, які, паводле яго, «нікуды ня зьнікне, і людзі будуць яго знаходзіць».
Навальны падаў пазоў да «Роскомнадзора», які абавязаў палітыка выдаліць з сайту Navalny.com дадзеныя расьсьледаваньня Фонду барацьбы з карупцыяй пра кіраўніка апарату ўраду Расеі Сяргея Прыходзьку і мільярдэра Алега Дзерыпаску. Пра гэта паведамлялася 13 лютага са спасылкай на тэкст пазову.
Дзерыпаска і Прыходзька назвалі расьсьледаваньне Навальнага «правакацыяй». «Роскомнадзор» па рашэньні Усьць-Лабінскага суду Краснадарскага краю ўнёс відэазапіс расьсьледаваньня і блог Навальнага ў рэестар забароненых сайтаў. Ведамства таксама запатрабавала ад Радыё Свабода, «Медиазоны», Znak.com, Newsru.com, «Сноба» і The Village выдаліць фатаграфіі, відэа і «іншую асабістую інфармацыю» з публікацый пра Дзерыпаску.