Вашынгтон таксама падкрэсьліў, што ня мае намеру заключаць дамоўленасьці за сьпіной Кіева, паведамляе Голас Амэрыкі.
ЗША зноў заклікалі Расею вывесьці свае сілы і цяжкія ўзбраеньні з усходняй Украіны і пагодзіцца на разьмяшчэньне ў рэгіёне міратворчага кантынгенту ААН, пры гэтым запэўніўшы Ўкраіну, што ніякіх дыпляматычных дамоўленасьцей аб спыненьні канфлікту за яе сьпіной заключацца ня будзе.
Заява прагучала на фоне візыту першага намесьніка дзяржсакратара ЗША Джона Салівана ў Кіеў, накіраванага, паводле яго слоў, на «дасягненьне палітычнага рашэньня, якое прызнае сувэрэнітэт Украіны і недапушчальнасьць прымяненьня гвалту для дасягненьня палітычных зьменаў».
Наўэрт: Мы ніколі не заключым дамоўленасьць па Ўкраіне без удзелу Ўкраіны.
Распавядаючы журналістам пра візыт Салівана, афіцыйная прадстаўніца Дзярждэпартамэнту Гэзэр Наўэрт у чацьвер паведаміла, што ён правёў сустрэчы з міністрам замежных спраў, прэм’ер-міністрам і прэзыдэнтам Пятром Парашэнкам, зь якім абмеркаваў важнасьць працягу рэформаў ва Ўкраіне, у асаблівасьці стварэньня незалежнага антыкарупцыйнага суду.
Саліван таксама падкрэсьліў, што ЗША па-ранейшаму падтрымліваюць сувэрэнітэт і тэрытарыяльную цэласнасьць Украіны. Гэзэр Наўэрт выказала шкадаваньне з нагоды таго, што Расея працягвае спрыяць працягу канфлікту ва ўсходняй Украіне, які ўнёс ужо больш за 10 000 жыцьцяў.
«Расея неаднаразова прадэманстравала, што можа спыніць гвалт, калі хоча, — заявіла яна. — ЗША яшчэ раз заклікаюць Расею загадаць сваім марыянэткавым сілам выконваць рэжым поўнага спыненьня агню, вывесьці свае сілы і цяжкія ўзбраеньні з усходняй Украіны і пагодзіцца на разьмяшчэньне там паўнавартаснага міратворчага кантынгенту ААН».
Яна таксама працытавала словы Салівана пра тое, што «улічваючы, як высокія стаўкі, важна выразна пазначыць палітыку ЗША ў дачыненьні да канфлікту: Крым — частка Ўкраіны. Данбас — частка Ўкраіны. Мы ніколі не пагодзімся на тое, каб адзін рэгіён Украіны быў выменяць на іншы. Мы ніколі не заключым дамоўленасьць па Ўкраіне без удзелу Ўкраіны».
У Расеі ж заклік ЗША быў успрыняты скептычна.
Старшыня Камісіі Савета Фэдэрацыі па інфармацыйнай палітыцы Аляксей Пушкоў адзначыў, што шанцы на тое, што Расія пагадзіцца на ўвядзеньне міратворцаў у Данбас на амэрыканскіх умовах, невялікія.
«Дзярждэп фактычна заклікае Маскву пагадзіцца на тое, каб міратворцы ААН адыгралі ролю акупацыйнай арміі ў Данбасе і аддалі яго на сподачку кіеўскаму рэжыму, а ён ужо правядзе даўно намечаную зачыстку Данбаса», — напісаў сэнатар у сваім мікраблогу ў Twitter.
«Схема зразумелая, але немагчымая. Пара б Дзярждэпу зразумець гэта», — дадаў Пушкоў.
«Міратворцаў зь Беларусі на Данбасе быць не павінна», — Шушкевіч пра гутарку з Парашэнкам
На мінулым тыдні міністар абароны Беларусі Андрэй Раўкоў заявіў, што Менск гатовы дапамагчы ва ўрэгуляваньні канфлікту на Данбасе. Ён сказаў, што ў 103-й паветрана-дэсантнай брыгадзе ў Віцебску існуе міратворчая рота са ста вайскоўцаў, якія вывучаюць ангельскую мову, праходзяць падрыхтоўку ў розных дзяржавах, маюць вопыт міратворчай дзейнасьці і гатовыя выконваць задачы ў любым рэгіёне сьвету. Але рашэньне аб іх удзеле ў місіі павінна прыняць рада Бясьпекі ААН, заявілі ў Менску.
У Міністэрстве замежных спраў Украіны заяўляюць, што беларускіх міратворцаў на Данбасе ня будзе, калі ў рэгіёне ня будзе міратворцаў краін-сябраў Арганізацыі паўночнаатлянтычнага альянсу (NATO). Пра гэта сказала ў эфіры «5 канала» намесьнік міністра замежных спраў Украіны ў пытаньнях эўрапейскай інтэграцыі Алена Зэркаль.
