Лінкі ўнівэрсальнага доступу

Берасьцейскім блогерам вынесьлі папярэджаньні за «заклікі выйсьці на плошчу»


Блогер Сяргей Пятрухін

Пракуратура Берасьця вынесла афіцыйнае папярэджаньне аб недапушчальнасьці парушэньня заканадаўства аб масавых мерапрыемствах блогеру Сяргею Пятрухіну. Напярэдадні падобнае папярэджаньне атрымаў і блогер зь Бярозы Аляксандар Кабанаў.

Пракуратура палічыла заклікам выйсьці на масавую акцыю словы Аляксандра Кабанава і Сяргея Пятрухіна, агучаныя імі ў онлайн-трансьляцыі, што яны выйдуць на плошчу ў Берасьці, калі ня спыніцца будаўніцтва акумулятарнага заводу.

Сяргей Пятрухін лічыць гэта ўціскам за іхнюю актыўнасьць у пратэстах супраць будаўніцтва заводу «АйПаўэр».

«Папярэджаньне вынес пракурор Іван Чайчыц. Апроч таго, па выхадзе з пракуратуры мяне яшчэ апыталі і міліцыянты — па факце скаргі на наш стрым з заводу ў Пінску. Усё гэта сплянаваны ціск за нашы відэа супраць заводу», — кажа Сяргей Пятрухін.

Позву прыехаць 23 лютага ў міліцыю ў Пінск для размовы наконт трансьляцыі з заводу атрымаў і блогер Аляксандар Кабанаў.

Супраць будаўніцтва заводу для вытворчасьці акумулятараў пад Берасьцем сабрана ўжо 37 тысяч подпісаў, расказаў спадар Пятрухін. Гэта больш як 10 % жыхароў Берасьця.

«І ніякай рэакцыі! У Ваўкавыску супраць падобнага прадпрыемства сабралі меней за 200 подпісаў — і яго закрылі, а ў нас не хапае такога вялікага абурэньня. Значыць, у гэтым нехта зацікаўлены», — мяркуе блогер.

Будаваць акумулятарны завод пад Берасьцем пачала ў канцы 2017 году кампанія «АйПаўэр» Віктара Лемяшэўскага. Падрадчыкам выступае Аньхойская замежднаэканамічная будаўнічая карпарацыя (Кітай).

Завод будуецца каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназуе, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.

Пад Берасьцем людзі выйшлі на сход супраць будоўлі акумулятарнага заводу

Ваша меркаваньне

Паказаць камэнтары

XS
SM
MD
LG