Лінкі ўнівэрсальнага доступу

Дашкевіча суд завочна аштрафаваў за паход у барбэршоп «Чэкіст»


Зьміцер Дашкевіч падчас наведваньня барбэршопу «Чэкіст»

Суд Цэнтральнага раёну Менску завочна асудзіў Зьмітра Дашкевіча і аштрафаваў на 30 базавых велічынь — 735 беларускіх рублеў.

Суд прызнаў Дашкевіча вінаватым у дробным хуліганстве падчас наведваньня барбэршопу «Чэкіст» 9 студзеня.

Група актывістаў на чале са Зьмітром Дашкевічам і блогерам Эдуардам Пальчысам правяла гутарку з супрацоўнікамі барбэршопа, спрабавала разьвесіць плякаты з прозьвішчамі больш як сотні беларускіх інтэлігентаў, забітых у кастрычніцкую ноч 1937 году.

Пратэст каля барбэршопа «Чэкіст» у Менску. ФОТА, ВІДЭА

Актывісты спрабавалі давесьці, што «называцца супрацоўнікам карнага органа, які спрычыніўся да масавых рэпрэсій, — гэта як мінімум дэманстраваць няведаньне гісторыі» і што «з такім жа посьпехам, можна было ўзяць назву „Гестапавец“».

Згодна зь міліцэйскім пратаколам аб адміністрацыйным парушэньні, Дашкевіч «настырна навязваў сваю прысутнасьць», «у [неразборліва] форме патрабаваў зьмяніць назву і мэблю» і «наўмысна парушаў дзейнасьць» установы, чым выявіў «непавагу да грамадзтва». Сьведкамі выступілі супрацоўнікі барбэршопа Ільля Мятліцкі і Алег Кот.

Лукашэнку ня сорамна за злачынствы чэкістаў

Чэкістамі ў СССР называлі работнікаў Усерасейскай надзвычайнай камісіі ў барацьбе з контрарэвалюцыяй і сабатажам (скарочана па-расейску ЧК), затым слова выкарыстоўвалі і ў дачыненьні «нашчадкаў» ЧК: НКВД, МГБ, КГБ.

Аляксандар Лукашэнка неаднаразова казаў сілавікам не саромецца назвы «чэкісты» і гісторыі спэцслужбаў у Беларусі. У апошні раз ён далучыў сябе да ліку чэкістаў — маўляў, «да нас прэтэнзіі выставіць цяжка», бо «мы былі часткай сыстэмы, і тым ня менш бясчынства ў нас у Беларусі заўсёды было менш».

«Продкі» беларускага КДБ пастаянна, ад самага 1917 году, удзельнічалі ў палітычных рэпрэсіях супраць беларусаў. Пад рэпрэсіі трапілі, паводле розных ацэнак, ад 600 тысяч да 1,4 мільёна беларусаў, але колькасьць ахвяраў дакладна невядомая — архівы, зьвязаныя зь імі, дагэтуль закрытыя. Але гаворка ідзе пра дзясяткі тысяч забітых у часы сталінскіх рэпрэсіяў.

Ваша меркаваньне

Паказаць камэнтары

XS
SM
MD
LG