Лінкі ўнівэрсальнага доступу

Новы кіраўнік «Белай Русі» Давыдзька пра беларускую мову, нацыянальны ўнівэрсытэт і працу па начах


Генадзь Давыдзька падчас зьезду
Генадзь Давыдзька падчас зьезду

Падчас сёньняшняга зьезду праўладнай арганізацыі «Белая Русь» яе новаабраны кіраўнік Генадзь Давыдзька адказаў на пытаньні карэспандэнта Свабоды.

«Адсотак беларускай мовы на тэлевізіі расьце»​

— Чаму ўсё афармленьне зьезду на расейскай мове? Гэта працоўная мова «Белай Русі»?

— Гэта адна зь дзяржаўных моваў, і я ня бачу тут істотнага пытаньня. 80 адсоткаў ці нават болей у Беларусі гавораць на расейскай мове, вы ж гэта бачыце. Мусіць, трэба нешта і па-беларуску напісаць.

Я ведаю, што шмат хто зь «Белай Русі» добра гаворыць па-беларуску. А тое, што тут выявы толькі на расейскай мове... Бадай, афармляльнік вырашыў, што гэта будзе больш прыемна для дэлегатаў.

— Калі беларуская мова будзе больш шырока выкарыстоўвацца ў праграмах тэлебачаньня?

— Мы намагаемся гэта рабіць. Стварылі тэлеканал «Беларусь 3», і адсотак беларускай мовы ў ягоных праграмах паступова расьце.

— А як вы ставіцеся да ідэі стварэньня нацыянальнага ўнівэрсытэту?

— Ідэя цікавая, трэба працаваць над гэтым. І калі будуць ахвочыя, якія ня проста гавораць на беларускай мове, а веды якіх адпавядаюць статусу ВНУ, тады чаму б і не.

«​У мяне ненармаваны працоўны дзень​»​

— Дэлегаты афармлялі камандзіроўкі, каб прыехаць на зьезд. А як вам сёньня ўдалося сысьці з працы?

— У мяне ненармаваны працоўны дзень. Ён у мяне часам канчаецца нават апоўначы. Пасьля праграмы «Панарама» я пачынаю адпачываць. А пачынаю працоўны дзень, бывае, і ноччу. Бывае, у выходныя і ў сьвяточныя дні працую. Так што лічыць мае працоўныя дні ня трэба.

— То бок вас адпусьцілі без праблем?

— Хто мяне адпусьціў? Я сам прыехаў сюды. І першую палову дня я буду тут. А потым паеду на тэлебачаньне, адкуль пайду ажно ўначы.

Зьезд праўладнага аб’яднаньня «Белая Русь» у фотарэпартажы Свабоды

Пра палітычную партыю: «​Не насьпеў час»​

— Ці варта станавіцца палітычнай партыяй «Белай Русі»?

— Ня варта. Не насьпеў яшчэ час. І потым, палітычныя партыі змагаюцца за ўладу, а «Белая Русь» павінна заставацца грамадзкай арганізацыяй, якая падтрымлівае стабільнасьць, незалежнасьць, дзяржаўнасьць. Гэта галоўнае.

— А калі Аляксандар Лукашэнка скажа, што трэба стаць партыяй?

— Гэта будзе вырашаць зьезд.

Падчас зьезду «Белай Русі»
Падчас зьезду «Белай Русі»

Хто такі Давыдзька — актор Купалаўскага і кіраўнік БТ

Генадзю Давыдзьку 62 гады, ён родам зь Сянна Віцебскай вобласьці. Давыдзька вучыўся ў Далёкаўсходнім пэдагагічным інстытуце мастацтваў у расейскім Уладзівастоку, затым у Беларускай акадэміі мастацтваў.

Пачаў працаваць артыстам Арэнбурскага драмтэатру ў савецкай Расеі, адслужыў у савецкім войску, затым стаў артыстам Магілёўскага абласнога тэатру драмы і камэдыі, пасьля — у Купалаўскім тэатры.

Урэшце ў 1997 годзе стаў дырэктарам Купалаўскага тэатру, быў ім да 2004 году, пакуль не абраўся дэпутатам у Палату прадстаўнікоў, у якой прабыў два тэрміны (у якасьці дэпутата заклікаў, сярод іншага, да легалізацыі прастытуцыі).

З канца 2010 году працуе старшынём дзяржаўнай Белтэлерадыёкампаніі — у яе ўваходзяць «нумарныя» тэлеканалы «Беларусь» («Беларусь-1», «Беларусь-2» і так да 5 і міжнародны 24), а таксама «НТВ-Беларусь», радыёстанцыі «Першы Нацыянальны канал», «Культура», «Сталіца», «Радыюс-FM» і міжнароднае радыё «Беларусь», а таксама Агенцтва тэлевізійных навінаў. Прызначыў Давыдзьку асабіста Аляксандар Лукашэнка.

Адзін зь першых праектаў Давыдзькі на БТ — прапагандысцкі фільм «Плошча. Жалезам па шкле», дзе ён выступіў дыктарам. Пры ім БТ дагэтуль здымае прапагандысцкія фільмы, у тым ліку нядаўнія «Званок сябру» і «Белы легіён чорных душаў».

У красавіку ў розных месцах Менску, у тым ліку на фоне будынку Белтэлерадыёкампаніі, зьявіліся выявы кіраўніка Белтэлерадыёкампаніі Генадзя Давыдзькі ў выглядзе тэлепузіка. Аўтары гэтых вулічных партрэтаў называлі іх адказам на прапагандысцкую кампанію па беларускім тэлебачаньні, накіраваную супраць іншадумцаў, якім не даецца слова.

Таксама Давыдзька — старшыня праўладнай асацыяцыі «Беларуская канфэдэрацыя творчых саюзаў».

Генадзь Давыдзька: «Человек не венец, а пи...ец природы»

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG