У Тэгеране, заявілі, што атамнае пагадненьне не зьяўляецца прадметам гандлю.
«Гэтая дамова зьяўляецца міжнародна прызнаным і завершаным пактам і не можа зьяўляцца прадметам новых абмеркаваньняў», — заявіла міністэрства замежных спраў Ірану ў суботу, 13 студзеня. У дакумэнце ўказваецца, што па гэтай прычыне Тэгеран не пагодзіцца на ўнясеньне паправак і не прыме на сябе новых абавязацельстваў, якія выходзяць за рамкі дамовы, заключанай у Вене ў 2015 годзе.
12 студзеня прэзыдэнт ЗША Дональд Трамп заявіў пра намер прыняць новыя санкцыі ў дачыненьні да Ірану.
Раней Белы дом адтэрмінаваў аднаўленьне санкцыяў на 120 дзён, аднак адначасова заявіў, што на працягу гэтага тэрміну ў атамнае пагадненьне павінны быць унесены сур’ёзныя зьмены. У цэлым, прэзыдэнт Трамп высунуў 4 ультыматыўныя патрабаваньні:
- Іран, па словах Трампа, павінен даць міжнародным інспэктарам магчымасьць агледзець абсалютна ўсе аб’екты, якія яны запатрабуюць для праверкі;
- павінна быць гарантавана, што Ісламская Рэспубліка ніколі ня зможа атрымаць ядзерную зброю;
- пагадненьне павінна мець неабмежаваны тэрмін дзеяньня;
- Трамп лічыць, што нельга разглядаць паасобку ядзерную праграму Ірану і працу над стварэньнем балістычных ракет, здольных несьці ядзерную зброю.
Тэгеран ужо неаднаразова падкрэсьліваў, што складзенае ў Вене пагадненьне распаўсюджваецца выключна на іранскую атамную праграму і ня мае нічога агульнага зь ягонай ракетнай праграмай або зь ягонай палітыкай на Блізкім Усходзе, якая выклікае нараканьні ў ЗША. У апублікаванай 13 студзеня заяве іранскага МЗС адзначаецца, што, калі ЗША адмовяцца ад выкананьня ўмоваў атамнага пагадненьня, то Іран таксама ня будзе выконваць гэтую дамову.
