Пра гэта са спасылкай на вайсковыя і дыпляматычныя крыніцы паведамляе расейская газэта «Коммерсант». Афіцыйна Міністэрства абароны Расеі пакуль не камэнтуе гэтую інфармацыю.
Сьцьвярджаецца, што выведзеныя са строю чатыры франтавыя бамбавікі Су-24, два шматмэтавыя зьнішчальнікі Су-35С і адзін вайскова-транспартны самалёт Ан-72. Абстралялі базу, як сьцьвярджаецца, радыкальныя ісламісты. База Хмэймім знаходзіцца ў тыле сырыйскіх урадавых войскаў.
Расейскія СМІ і афіцыйныя асобы раней паведамлялі пра абстрэл базы ў іншы дзень — 27 сьнежня. Тады, як сьцьвярджаецца, людзі і тэхніка не пацярпелі.
Раней Міністэрства абароны Расеі прызнала гібель 31 сьнежня двух вайскоўцаў у Сырыі — разьбіўся верталёт, у якім яны ляцелі. Як сьцьвярджаецца, прычынай крушэньня стала тэхнічная няспраўнасьць.
11 сьнежня авіябазу Хмэймім наведаў Уладзімір Пуцін, які абвясьціў там пра вывад расейскай групоўкі з Сырыі. Расейскія базы ў гэтай краіне, аднак, застаюцца, а расейская авіяцыя працягвае дапамагаць войскам сырыйскага прэзыдэнта Башара Асада.
