Лінкі ўнівэрсальнага доступу

«90% хочуць на Дзень Волі сьвята, а ня боек». Стартавала кампанія да 100-годзьдзя БНР


Блогер Эдуард Пальчыс разам з пляцоўкай «Арт Сядзіба» і крамай symbal.by абвясьцілі пра пачатак нацыянальнай кампаніі сьвяткаваньня 100-годзьдзя незалежнасьці Беларускай Народнай Рэспублікі.

«Адсьвяткаваць юбілей БНР можна і без падтрымкі дзяржавы. Галоўнае, каб людзі, якія адносяць сябе да так званага незалежнага сэктару, не былі пасыўнымі», — гаворыць Пальчыс у інтэрвію Радыё Свабода.

Стваральнік сайту 1863x.com кажа, што не зьбіраўся брацца за арганізацыю юбілею БНР і спадзяваўся, што гэтым зоймецца нехта іншы.

Эдуард Пальчыс на акцыі ў абарону Курапатаў
Эдуард Пальчыс на акцыі ў абарону Курапатаў

«Але час ішоў, прайшло лета, вучэньні „Захад-2017“, і ніхто за гэта не браўся. З Паўлам Белавусам з symbal.by і Алесем Сьнегам з „Арт Сядзібы“ мы сабраліся і вырашылі, што трэба нешта рабіць, бо інакш ніхто гэтага ня зробіць».

Сотую гадавіну абвяшчэньня незалежнасьці БНР Эдуард Пальчыс лічыць «найлепшым часам для ўцягваньня людзей у нацыянальна арыентаванае асяродзьдзе». Паводле яго, вялікія юбілеі гістарычных падзеяў прачыняюць сьвядомасьць людзей і абуджаюць цікавасьць да гісторыі.

«У нас узьнікла праграма, каб па ўсёй Беларусі і ў краінах, дзе ёсьць беларускія дыяспары, адбываліся сьвяткаваньні і каб людзі самаарганізоўваліся. Хто ня можа гэтага зрабіць, мы гатовыя такім людзям дапамагчы ідэяй, арганізацыяй, парадай, як зрабіць сьвята ў горадзе ці іншай мясцовасьці, і выбраць найлепшы фармат», — кажа Пальчыс.

Адзначэньне юбілею ініцыятары кампаніі бачаць як шматфарматнае сьвяткаваньне: ад інтэрнэт-флэшмобаў да кірмашоў, фэстываляў, вечарынаў.

«Часта людзі пішуць: маўляў, я хачу нешта зрабіць, але ня ведаю што. Ініцыятыва ёсьць, але без напаўненьня. Калі ўладальнік, напрыклад, кавярні, мае жаданьне нешта зрабіць, то няхай такая асоба піша Паўлу Белавусу ў symbal.by. За рэгіёны адкзавае „Арт Сядзіба“. За дыяспару — Згуртаваньне беларусаў сьвету „Бацькаўшчына“» — тлумачыць блогер.

Сам Пальчыс будзе займацца інфармацыйнай часткай. Ён рыхтуе сэрыю публікацяў з нагоды юбілею БНР, будзе кантактаваць з гісторыкамі і культуролягамі. У амаль 10-мільённай краіне, на ягоную думку, ня ўсе ведаюць, што такое БНР.

Лога нацыянальнай кампаніі па сьвяткаваньні юбілею БНР
Лога нацыянальнай кампаніі па сьвяткаваньні юбілею БНР

Ад арганізацыі вулічнай акцыі 25 Сакавіка Пальчыс і ягоныя калегі адмяжоўваюцца. Фармат палітычнай пратэставай акцыі ён называе бессэнсоўным.

«Вядома, ідэальны сцэнар — гэта вялікае шэсьце па цэнтры гораду са сьцягамі, з талковай рэжысурай. Але ўлады гэтага не дазволяць. А плян „няхай людзі прыходзяць і на месцы будзем бачыць, што рабіць“, — дзіўны. Таму акцыя будзе зноў пратэставаю і стане нагодай для піяру розных арганізацыяў», — мяркуе блогер.

Наконт фармату сьвятаканьня Пальчыс праводзіў апытаньне ў сацыяльных сетках. 90%, паводле яго, выбіралі ня акцыю пратэсту, а сьвяткаваньне ў кожнай іншай форме.

Паводле Эдуарда Пальчыса, гісторыя стала палітычнай зброяй, таму годнае адзначэньне юбілею і рост нацыянальнай сьвядомасьці дапамогуць «абараніцца ад вірусаў з Усходу, якія зьнішчаюць грамадзтвы».

«Гісторыя БНР — процівага расейскай прапагандзе "Мы адзін народ". Каб пазьбегчы непрыемнасьцяў, людзі абіраюць сваю ідэнтычнасьць: хто мы і дзе мы знаходзімся. Трэба, каб людзі адзначылі гэты дзень як сапраўднае сьвята, няхай нават проста ў сям’і. Нават дома за сталом, без шэсьця. Гэта ўжо вялікі плюс для росту сьвядомасьці. Мы хочам унікнуць разгонаў, дубінак, паразаў, ранаў, якія потым вечна залізваць», — кажа Пальчыс.

Ваша меркаваньне

Паказаць камэнтары

XS
SM
MD
LG