Лінкі ўнівэрсальнага доступу

Лукашэнка падпісаў дэкрэт «Аб разьвіцьці прадпрымальніцтва», каб «палепшыць бізнэс-клімат»


Аляксандар Лукашэнка 23 лістапада падпісаў дэкрэт «Аб разьвіцьці прадпрымальніцтва», паведаміла прэс-служба кіраўніка Беларусі. Адзначаецца, што гэта ключавы дакумэнт пакету нарматыўных прававых актаў па паляпшэньні бізнэс-клімату.

Дэкрэт прадугледжвае «кардынальную зьмену мэханізмаў узаемадзеяньня дзяржаўных органаў і бізнэсу, мінімізуе ўмяшаньне службовых асобаў у працу суб’ектаў гаспадараньня і ўзмацняе мэханізмы самарэгуляваньня бізнэсу, яго адказнасьць за сваю працу перад грамадзтвам», адзначаецца ў паведамленьні.

«Для рэалізацыі дэкрэту яшчэ 200 крокаў». Лідэры прадпрымальнікаў пра новы дэкрэт прэзыдэнта

Пры гэтым з боку дзяржавы захоўваецца мінімальна неабходны ўзровень кантролю, адзначае прэс-служба Лукашэнкі.

Паведамляльны парадак рэгістрацыі бізнэсаў

Дзеля дасягненьня гэтых мэтаў, паводле прэс-службы Лукашэнкі, уводзіцца паведамляльны парадак ажыцьцяўленьня найбольш распаўсюджаных відаў эканамічнай дзейнасьці. Гэта бытавыя, турыстычныя, сацыяльныя паслугі, дзейнасьць у сфэры гандлю і грамадзкага харчаваньня, перавозак пасажыраў і багажу, вытворчасьць прадукцыі, будматэрыялаў і іншыя распаўсюджаныя віды дзейнасьці.

«Такім чынам, дзеяньне дакумэнту ахоплівае сфэры, у якіх засяроджана прыкладна 95% малога і сярэдняга бізнэсу», — падкрэсьлілі ў прэс-службе.

Для ажыцьцяўленьня гэтых відаў дзейнасьці дастаткова будзе падаць адзінае апавяшчэньне ў выканкам праз службу «адно акно» (дапускаецца паштовае адпраўленьне з паведамленьнем аб уручэньні) альбо з дапамогай парталу электронных паслуг. На наступны дзень ужо можна займацца заяўленым відам дзейнасьці.

Ілюстрацыйнае фота
Ілюстрацыйнае фота

Пажарныя і санітарныя нормы «максымальна сыстэматызаваныя і скарочаныя»

Дэкрэт зацьвердзіў «максымальна сыстэматызаваныя і скарочаныя» агульныя патрабаваньні пажарнай бясьпекі, санітарна-эпідэміялягічныя патрабаваньні, патрабаваньні ў галіне аховы навакольнага асяродзьдзя і вэтэрынарыі да разьмяшчэньня, абсталяваньня, утрыманьня і эксплюатацыі капітальных пабудоў, ізаляваных памяшканьняў. Яны будуць абавязковыя для выкананьня ўсімі субʼектамі эканамічнай дзейнасьці.

Палажэньні іншых тэхнічных нарматыўных прававых актаў, якія зьмяшчаюць патрабаваньні ў гэтай сфэры, будуць цяпер, да іх адмены, мець для прадпрымальнікаў выключна рэкамэндацыйны характар.

Ліквідуюцца адміністрацыйныя барʼеры

Як адзначаецца ў паведамленьні, дэкрэтам «максымальна ліквідуюцца» адміністрацыйныя барʼеры, зьвязаныя са складанымі і працяглымі працэдурамі, атрыманьнем мноства даведак, узгадненьняў і іншай дазвольнай дакумэнтацыі.

Так, прадпрыемствам сфэры гандлю і грамадзкага харчаваньня ня трэба будзе зьвяртацца ў выканкамы па ўзгадненьне рэжыму працы крам, рэстаранаў і кафэ. Выключэньне зробленае толькі для ўстаноў, якія працуюць у начны час (з 23.00 да 7.00).

У сфэры транспартнай дзейнасьці адмяняецца абавязковае патрабаваньне афармляць дарожныя лісты для перавозак пасажыраў і багажу ў нерэгулярных зносінах.

Адмяняюцца іншыя залішнія і эканамічна затратныя патрабаваньні і абмежаваньні для бізнэсу ў сфэрах вытворчасьці прадукцыі, будаўніцтва і транспарту, гандлю і іншых.

Кіраўнік адкажа штрафамі за працу прадпрыемства

Адначасова дэкрэт вызначае адміністрацыйную адказнасьць кіраўніка за забесьпячэньне нармальнай працы прадпрыемства. У прыватнасьці, за непрыняцьце ім неабходных захадаў дзеля належнай арганізацыі дзейнасьці прадпрыемства, калі гэта пацягнула за сабой шкодныя наступствы і калі няма прыкмет злачынства ці іншага адміністрацыйнага правапарушэньня, прадугледжаны штраф ад 10 да 200 базавых велічынь.

«Гэтая мера закліканая павысіць адказнасьць бізнэсу за сваю дзейнасьць перад грамадзтвам і дзяржавай на фоне лібэралізацыі патрабаваньняў», — удакладнілі ў прэс-службе.

Чаго чакаюць ад дэкрэту

У прэс-службе лічаць, што дакумэнт мае надаць «​неабходны імпульс разьвіцьцю прадпрымальніцкай ініцыятывы, стымуляваць дзелавую актыўнасьць грамадзян і ў цэлым палепшыць інвэстыцыйны клімат у краіне»​.

Дакумэнт мае надаць «неабходны імпульс разьвіцьцю прадпрымальніцкай ініцыятывы, стымуляваць дзелавую актыўнасьць грамадзян, палепшыць інвэстыцыйны клімат»​

БелаПАН нагадвае, што дэкрэт «Аб разьвіцьці прадпрымальніцтва» рыхтаваўся ў межах дзейнасьці створанай у студзені 2017 году працоўнай групы па стымуляваньні дзелавой актыўнасьці на чале з кіраўніком Адміністрацыі прэзыдэнта Натальляй Качанавай. З чальцамі працоўнай групы Лукашэнка абмяркоўваў будучы дакумэнт на сустрэчы ў лютым. Першапачаткова меркавалася, што дэкрэт можа зьявіцца ўжо ў другім квартале гэтага году.

19 верасьня Лукашэнка падпісаў указ №337, які дазволіў індывідуальным прадпрымальнікам весьці шэраг відаў дзейнасьці без рэгістрацыі, але з выплатай адзінага падатку.

Паводле неафіцыйнай інфармацыі, цяпер рыхтуецца сустрэча кіраўніка дзяржавы з прадстаўнікамі бізнэсу.

Насуперак «лібэралізацыі». Чаму колькасьць прадпрымальнікаў у Беларусі скарачаецца?

Ваша меркаваньне

Паказаць камэнтары

XS
SM
MD
LG