«Сына судзілі за акцыю памяці ахвяраў рэпрэсаваных 29 кастрычніка, што зьнічкі запалілі каля будынка КДБ. Зноў вялікі штраф, хаця ніякага парушэньня парадку не было», — паведаміла Свабодзе маці актывіста Галіна Сіўчык.
Паводле яе, Вячаслаў Сіўчык на судзе ня быў.
«Славы цяпер няма ў Менску», — сказала Галіна Сіўчык.
17 лістапада Цэнтральны раённы суд Менску таксама аштрафаваў Вячаслава Сіўчыка на 40 базавых велічынь за ўдзел у «Маршы абураных беларусаў 2.0», які прайшоў у Менску 21 кастрычніка.
29 кастрычніка каля уваходу ў КДБ на заклік Мікалая Статкевіча прайшла акцыя «Ланцуг памяці», прысьвечаная 80-годзьдзю расстрэлу больш як ста беларускіх творцаў і дзеячоў. На прыступках галоўнага уваходу ў КДБ актывісты ўсклалі кветкі і зьнічкі.
У акцыі бралі удзел больш як 20 чалавек, у тым ліку людзі, якія раней не ўдзельнічалі ў акцыях апазыцыі. Мітынгу ўдзельнікі «Ланцугу памяці» не праводзілі. Міліцыя пра тое, што акцыя недазволеная, нікога не папярэджвала.
