Дакумэнты для рэгістрацыі ініцыятыўнай групы на выбарах мясцовых Саветаў дэпутатаў неабходна прадставіць не пазьней за 14 сьнежня, паведамляе БЕЛТА.
Адзін са спосабаў вылучыць кандыдата ў дэпутаты — праз ініцыятыўную групу, якая зьбірае подпісы. У яе мусіць уваходзіць ад 3 да 10 чалавек. Ініцыятыўная група мае быць зарэгістраванай тэрытарыяльнай, акруговай выбарчай камісіяй. Дакумэнты для рэгістрацыі ініцыятыўнай групы неабходна прадставіць не пазьней за 14 сьнежня.
Мясцовыя выбары ў Беларусі пройдуць 18 лютага. Тэрміны вылучэньня кандыдатаў — з 10 сьнежня 2017 года па 8 студзеня 2018 года ўключна. Пэрыяд перадвыбарчай агітацыі працягнецца да 18 лютага.
Яшчэ да абвяшчэньня даты мясцовых выбараў дэмакратычныя сілы Беларусі перадалі ў Цэнтральную выбарчую камісію свае прапановы аб зьмяненьні правілаў выбраньня дэпутатаў. Дакумэнт распрацавалі юрысты на падставе прапаноў Бюро дэмакратычных інстытутаў і правоў чалавека (БДІПЧ) АБСЭ. Пад ім падпісаліся прадстаўнікі ўсіх дэмакратычных палітычных арганізацыяў Беларусі. Аднак улады іх праігнаравалі.
