Лінкі ўнівэрсальнага доступу

Дзедаўшчына трапіць на інтэрактыўную карту праваабаронцаў


Грамадзкае аб’яднаньне «Прававая ініцыятыва» праводзіць маніторынг службы ў войску. Зь яго дапамогай ініцыятары зьбіраюцца выявіць факты вымаганьня, псыхалягічнага і фізычнага гвалту.

А таксама скласьці інтэрактыўную карту парушэньняў у вайсковых частках.

Усім, хто служыў у войску, прапануецца запоўніць адмысловую анкету. Старшыня «Прававой ініцыятывы» Вікторыя Фёдарава сказала карэспандэнту Свабоды, што за 6 дзён маніторынгу атрымана 36 анкет.

«Трагічны выпадак у Печах з Аляксандрам Коржычам паказаў, што ў Беларусі няма профільных няўрадавых арганізацый, якія займаюцца праблемамі салдат тэрміновай службы, якія служаць у войску. Вядома, і наша арганізацыя ня профільная, аднак сытуацыя патрабуе хуткага рэагаваньня. Паколькі інфармацыя дастаткова закрытая, то, параіўшыся, мы вырашылі для пачатку заняцца маніторынгам, дзеля чаго распрацавалі гугл-форму анкеты», — сказала Вікторыя Фёдарава.

Праваабаронцы спадзяюцца, што з дапамогай маніторынгу змогуць глыбей вывучыць сытуацыю са службай у беларускім войску.

Мы спадзяёмся, што людзі перастануць баяцца і ўсё ж такі пачнуць пісаць пра свае выпадкі нестатутных адносін

«36 анкет — гэта няшмат, але ўжо нешта. Мы спадзяёмся, што людзі перастануць баяцца і ўсё ж такі пачнуць пісаць пра свае выпадкі нестатутных адносін. Мы маем вопыт маніторынгу, паколькі ў мінулым годзе пасьпяхова скончылі маніторынг ізалятараў часовага ўтрыманьня па 4 абласьцях Беларусі і Менску», — кажа Вікторыя Фёдарава.

Ініцыятары пакуль ня вырашылі, як доўга весьці маніторынг — «усё будзе залежаць ад жаданьня людзей запаўняць анкеты».

«Па завяршэньні маніторынгу мы будзем працаваць зь дзяржорганамі, патрабуючы паляпшэньня сытуацыі ў войску. Як адну з магчымых мэтаў мы бачым пачатак кампаніі за кантрактную службу ў войску, але ўсё будзе залежаць ад вынікаў маніторынгу і актыўнасьці грамадзян», — кажа Вікторыя Фёдарава.

«Прававая ініцыятыва» запэўніла, што асабістыя дадзеныя апытаных публікавацца ня будуць.

Тым часам Праваабарончы цэнтар «Вясна» склаў рэкамэндацыі сваякам салдатаў пра тое, як змагацца зь дзедаўшчынай.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG