На пасяджэньні клюбу «Валдай» у Сочы прафэсар з Таліну распавёў прысутным пра сустрэчу Козырава з Рычардам Ніксанам (былым прэзыдэнтам ЗША). На сустрэчы, якая адбылася ў пачатку 1990-х гадоў, Козыраў, па словах прафэсара, нібыта сказаў, што «ў Расеі няма нацыянальных інтарэсаў, а ёсьць толькі агульначалавечыя інтарэсы». Уладзімір Пуцін на гэта адрэагаваў словамі, што ў былога кіраўніка расейскага МЗС «няма галавы, а толькі чарапная каробка».
Андрэй Козыраў, першы міністар постсавецкай Расеі (з кастрычніка 1990 па студзень 1996 гадоў), у спэцыяльным камэнтары для выданьня The Insider на гэта адказаў:
«Ніксану я казаў тое ж, што і іншым. Нацыянальныя інтарэсы Расеі, як і іншых дэмакратый, у прынцыпе адпавядаюць агульначалавечым. І мы стваралі СНД, не ваявалі з брацкай Украінай, сябравалі з найбольш разьвітымі краінамі Эўропы і Амэрыкі, не былі пад санкцыямі. Расейцы не паміралі, ваюючы на баку дыктатара ў Сырыі. [...] Інтарэсы Расеі процілеглыя інтарэсам рэжыму, у лідэраў якога чарапная каробка павернутая назад, у КДБ», — сказаў Козыраў выданьню The Insider.
Андрэй Козыраў быў міністрам замежных справаў Расеі з 11 кастрычніка 1990 году па 5 студзеня 1996 году.