Лінкі ўнівэрсальнага доступу

Нацбанк Украіны забараніў апэрацыі з расейскімі 200-рублёвымі купюрамі


Нацбанк Украіны ў пятніцу забараніў банкам Украіны ажыцьцяўляць апэрацыі з новымі расейскімі грашмі (банкнотамі і манэтамі), на якіх «намаляваныя аб’екты, разьмешчаныя на акупаванай тэрыторыі Ўкраіны». Гэта значыць тыя, якія знаходзяцца ў Крыме.

Забарона ўступае ў сілу з 17 кастрычніка 2017 году і тычыцца новых купюр — 200 расейскіх рублёў, якія былі прэзэнтаваныя ў чацьвер, «вэртыкальнай» сувэнірнай банкноты 100 рублёў, выпушчанай у 2015 годзе, а таксама іншых манэтаў і банкнотаў, калі на іх будзе фігураваць анэксаваны Расеяй Крым.

Нацбанк Украіны забараніў банкам, а таксама іх філіялам і аддзяленьням весьці любыя касавыя разьлікі гэтымі купюрамі, а таксама абменьваць іх на іншую валюту.

«Забарона распаўсюджваецца таксама на апэрацыі, якія выконваюцца пры куплі і продажы наяўнай замежнай валюты паміж банкамі», — падкрэсьліваюць у Нацбанку.

Абмежаваньні пашыраюцца ня толькі на банкі, але і на кампаніі, якія займаюцца фінансавымі пераводамі. Ім, а таксама «Укрпочце» забараняецца прымаць і выдаваць наяўныя грошы «крымскімі» купюрамі і манэтамі.

XS
SM
MD
LG