Лінкі ўнівэрсальнага доступу

Лідэры «Гавары праўду» прапанавалі міністру ЖКГ стварыць сайт пра камунальныя плацяжы


Як зрабіць, каб кожны жыхар Беларусі пры жаданьні мог атрымаць праз інтэрнэт дакладную інфармацыю, чаму менавіта такую, а ня іншую суму ён плаціць за кожную камунальную паслугу? Гэтае пытаньне стала галоўным падчас сёньняшняй сустрэчы лідэраў грамадзянскай кампаніі «Гавары праўду» Андрэя Дзьмітрыева і Тацяны Караткевіч зь міністрам жыльлёва-камунальнай гаспадаркі Беларусі Аляксандрам Церахавым.

«Мы прапанавалі міністру зрабіць адмысловы сайт, — кажа Свабодзе Андрэй Дзьмітрыеў. — І каб кожны разумеў, за што і колькі ён плаціць. Чалавек уводзіць праз кампутар свой адрас і атрымлівае поўную інфармацыю, адкуль зьявіліся менавіта такія лічбы і якія на сёньня тарыфы на кожную паслугу. Цяпер мы чуем, што нібыта аплачваем толькі 60% ці 70% агульнага кошту паслугаў. Калі інтэрнэт-сыстэма пачне дзейнічаць, кожны сам убачыць, колькі грошай бяруць зь ягонай кішэні і колькі зь дзяржаўнай».

Паводле Дзьмітрыева, міністар пагадзіўся, што трэба мець лепшую, чым цяпер, сыстэму інфармаваньня насельніцтва і працы зь людзьмі.

«Зь цяперашняй сыстэмай занадта шмат пытаньняў, на якія людзі альбо ня маюць адказу, альбо ня ведаюць, дзе іх знайсьці», — сказаў лідэр «Гавары праўду».

Ажывіць кансультатыўна-грамадзкую раду

Лідэр «Гавары праўду» расказаў і пра другую тэму перамоваў — грамадзкія слуханьні.

«Цяпер якраз абмяркоўваюцца зьмены да Жыльлёвага кодэксу. І вельмі важна, каб людзі маглі даваць свае прапановы, свае праўкі. Тут мы бачым велізарныя магчымасьці для кансультатыўна-грамадзкай рады, якая існуе пры міністэрстве. Мы прапанавалі далучыць да яе шырокую грамадзянскую супольнасьць, у тым ліку і кампанію „Гавары праўду“, — кажа Андрэй Дзьмітрыеў. — З ЖКГ у нас у краіне жывуць усе — ад нараджэньня да сьмерці. І мы задаволеныя пазыцыяй міністра, што грамадзкія слуханьні павінны праходзіць. Спадар Церахаў казаў нам і пра неабходнасьць парлямэнцкіх слуханьняў. І гэта правільная ідэя».

Паводле Андрэя Дзьмітрыева, кіраўнікі «Гавары праўду» атрымалі адказ і на сваё пытаньне, чаму служба «115» працуе толькі ў Менску.

«Міністар адказаў, што мясцовыя ўлады многіх іншых гарадоў не праяўляюць зацікаўленасьці ў стварэньні адзінай апэратыўнай службы. На наш погляд, гэта дрэнна. Таму тэма ЖКГ стане абавязковай для кожнага кандыдата ад „Гавары праўду“ падчас мясцовых выбараў».

Ваша меркаваньне

Паказаць камэнтары

XS
SM
MD
LG