Лінкі ўнівэрсальнага доступу

Віцебская міліцыя распачала справу за хуліганства паводле відэазапісу інцыдэнту ў аптэцы


35-гадовую жыхарку Віцебску будуць судзіць за абразу і хуліганства. Працэс, анансаваны міліцэйскімі структурамі, распачнецца ў Першамайскім райсудзе 1 верасьня а 10-й гадзіне.

Паказальна, што справа была распачатая без ініцыятывы ўдзельнікаў канфлікту: супрацоўнікі Першамайскага РАУС мусілі адрэагаваць на грамадзкі рэзананс, які выклікала публікацыя ў інтэрнэце. Нагадаем, відэазапіс з камэры назіраньня выклаў у публічны доступ аптэкар
Максім Самсонаў.


На відэазапісе відаць, што ў аптэку зайшла жанчына з сабакам. На заўвагу пра тое, што знаходзіцца з жывёламі тут забаронена, спадарыня адрэагавала брыдкай лаянкай, назваўшы «бруднай сьмярдзючай жывёлінай» хлопца-аптэкара. Гэта была далёка не адзіная абраза з тых, што давялося пачуць Максіму Самсонаву і ягонаму калегу.

Нягледзячы на абразы наведніцы, супрацоўнікі аптэкі паводзілі сябе спакойна, і пасьля таго, як яна ўрэшце вывела з памяшканьня свайго сабаку, не адмовіліся яе абслугоўваць. У міліцыю з заявай пра абразы і хуліганскія паводзіны Максім Самсонаў зьвяртацца не плянаваў. Адно што выклаў відэаролік у сацыяльныя сеткі — з тым, каб паказаць, якія выпадкі здараюцца на працы.

Вялікі рэзананс у інтэрнэце

У інтэрнэце здарэньне адразу набыло грамадзкі рэзананс. Жыхары Віцебску вельмі хутка «вылічылі» наведніцу аптэкі, паведамілі яе імя і прозьвішча — Марына Паяркава, а таксама месца працы — абутковая кампанія «Марка».

Паміж інтэрнэт-камэнтатарамі разгарэліся спрэчкі, ці патрэбная забарона на прысутнасьць жывёлаў у аптэках і крамах, але галоўным чынам абмяркоўвалі паводзіны спадарыні. Дарэчы, аптэкары папярэджвалі яе, што вядзецца відэазапіс, але жанчына адказвала ў тым самым грубым тоне.

Пазьней журналістам яна тлумачыла, што была ўзнэрваваная, бо яе «муж апёк ногі бэтонам», і яна «пайшла ў аптэку па лекі, каб заадно выгуляць сабаку». Прасіць прабачэньня яна не лічыла патрэбным і асьцерагалася, што яе «пасьля гэтага яшчэ больш зьняславяць у інтэрнэце».

Міліцыя адрэагавала

Урэшце на грамадзкі рэзананс адрэагавала міліцыя. Пра падзеі, зафіксаваныя на відэа, апыталі ўдзельнікаў канфлікту, і цяпер жанчыну чакае суд за абразу (артыкул 9.3 КаАП прадугледжвае пакараньне ў выглядзе штрафу памерам да 20 базавых велічынь) і за хуліганства (артыкул 17.1 КоАП таксама прадугледжвае штраф, але памерам ужо да 30 базавых велічынь, або адміністрацыйны арышт).

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG