Лінкі ўнівэрсальнага доступу

Пошукі зьніклага ў Беларусі ўкраінца: пракуратура Чарнігава расьсьледуе справу пра наўмыснае забойства


Паўло Грыб, зніклы ў Беларусі
Паўло Грыб, зніклы ў Беларусі

Пракуратура Чарнігава пачала дасудовае расьсьледаваньне абставінаў зьнікненьня ўкраінца Паўла Грыба — папярэдне сьледчыя кваліфікавалі справу паводле часткі 1 артыкулу 115 Крымінальнага кодэксу (наўмыснае забойства).

Як паведамілі Свабодзе ў прэсавай службе Генэральнай пракуратуры Ўкраіны, цяпер праводзяцца сьледчыя (вышуковыя) дзеяньні, накіраваныя перш за ўсё на пошук сьведак, абставінаў здарэньня і высьвятленьне месцазнаходжаньня зьніклага.

«У адпаведнасьці з патрабаваньнямі крымінальнага працэсуальнага заканадаўства, у кампэтэнтныя органы замежнай дзяржавы (Расеі — РС) рыхтуюцца хадайніцтвы аб аказаньні міжнароднай прававой дапамогі з мэтай пацьвярджэньня або абвяржэньня факта і падстаў затрыманьня і вышуку грамадзяніна Ўкраіны, яго месцазнаходжаньня», — адзначылі ў Генэральнай пракуратуры Ўкраіны.

Ігар Грыб, грамадзянін Украіны, які служыў у памежных войсках, а цяпер займаецца стварэньнем капэлянскай службы ў сілавых органах, напярэдадні заявіў, што спэцслужбы Расеі выкралі ягонага сына Паўла падчас наведаньня Беларусі.

24 жніўня 19-гадовы Паўло Грыб паехаў у Гомель на сустрэчу зь дзяўчынай, зь якой кантактаваў праз сацыяльныя сеткі. Яна мелася прыехаць на сустрэчу з Расеі. Хлопец плянаваў вярнуцца ў той самы дзень.

Калі гэтага ня здарылася, бацька паехаў у Гомель на пошукі і высьветліў, што сын знаходзіцца ў вышуку на падставе артыкулу 205 Крымінальнага кодэксу Расеі паводле абвінавачаньня ў тэрарыстычным акце на запыт ФСБ Расеі па Краснадарскім краі гораду Сочы.

Былы памежнік паведаміў, што ягоны сын Паўло ня браў удзелу ў баявых дзеяньнях на ўсходзе Ўкраіны — мае інваліднасьць.

На думку Грыба-старэйшага, ФСБ завабіла Паўла ў Гомель пад выглядам сустрэчы зь дзяўчынай і правяла затрыманьне. Прычынай магло стаць тое, што малады чалавек рэзка выказваўся ў сацыяльных сетках на адрас Расеі за яе агрэсію ва Ўкраіне.

Дыпляматычнае прадстаўніцтва Ўкраіны ў Менску накіравала ў МЗС Беларусі ноту з патрабаваньнем вызначыць месцазнаходжаньне ўкраінскага грамадзяніна, але ўвечары 28 жніўня стала вядома, што Паўла Грыба сярод затрыманых у сьледчых ізалятарах Беларусі няма.

МЗС Беларусі паведаміў, што «нота атрыманая, яна ў працы».

Міністэрства ўнутраных спраў Беларусі сьцьвярджае, што ніякіх заяў аб зьнікненьні ўкраінца ва ўпраўленьні міліцыі Гомельскай вобласьці не паступала.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG