Лінкі ўнівэрсальнага доступу

У Расеі заяўляюць аб затрыманьні ў анэксаваным Крыме чарговага «ўкраінскага дывэрсанта». Камэнтар СБУ: фэйк


Рэчы, канфіскаваныя нібыта ў затрыманага грамадзяніна Ўкраіны Генадзя Лімешкі, кадр зь відэа, распаўсюджанага ФСБ Расеі, 15 жніўня 2017

Расейскія інфармагенцтвы са спасылкай на Цэнтар грамадзкіх сувязяў ФСБ Расеі паведамляюць пра затрыманьне ў анэксаваным Крыме грамадзяніна Ўкраіны, які «спрабаваў пашкодзіць лінію электраперадачы і плянаваў іншыя дывэрсіі».

Пра гэта пішуць «РИА Новости», ТАСС і іншыя рэсурсы. На сайце самой Фэдэральнай службы бясьпекі Расеі гэтая інфармацыя зьявілася пасьля паведамленьняў інфармагенцтваў.

«Упраўленьнем ФСБ Расеі па Рэспубліцы Крым і Севастопалю ў ходзе апэратыўна-вышуковых мерапрыемстваў затрыманы агент Службы бясьпекі Ўкраіны ў Херсонскай вобласьці, накіраваны ў Крым для ўчыненьня дывэрсійных актаў», — гаворыцца ў паведамленьні.

Расейскія крыніцы падаюць і прозьвішча затрыманага.

«12 жніўня Генадзь Лімешка затрыманы супрацоўнікамі органаў ФСБ пры спробе пашкодзіць лінію электраперадачы ў раёне трасы Судак — Новы Сьвет», — сьцьвярджаюць у Расеі.

Расейскія спэцслужбы заяўляюць, што ў затрыманага канфіскаваная зброя, выбухоўка і лічбавы фотаапарат.

Служба бясьпекі Украіны назвала інфармацыю пра чарговае затрыманьне грамадзяніна Украіны ў анэксаваным Крыме «фэйкавай навіною».

«Расейская ФСБ зьвярнулася да чарговай правакацыі, паведаміўшы пра затрыманьне ў Крыме нібыта „агента СБУ“», — гаворыцца ў паведамленьні ўкраінскай спэцслужбы.

«На фоне пагаршэньня жыцьця крымчан, ФСБ зноў запускае „заежджаную кружэлку“, спрабуючы абвінаваціць Украіну і яе праваахоўныя органы ў сваіх уласных бедах і праблемах у Крыме», — дадаюць у СБУ.

Расея і раней неаднаразова заяўляла пра затрыманьне ў Крыме «ўкраінскіх дывэрсантаў». Украінскія спэцслужбы такія паведамленьні абвяргаюць.

Пазьней сёньня было паведамлена, што падкантрольны Крамлю Кіеўскі раённы суд Сімферопалю арыштаваў грамадзяніна Ўкраіны Генадзя Лімешку на два месяцы.

XS
SM
MD
LG