Былы старшыня Адэскай абласной дзяржадміністрацыі Ўкраіны Міхэіл Саакашвілі заявіў, што не зьбіраецца станавіцца ўцекачом і застаецца «большым украінцам, чым большасьць цяперашніх дэпутатаў».
Пра гэта ён заявіў у Facebook 27 ліпеня.
«Я жыву ва Ўкраіне ўжо больш за 13 гадоў, я браў удзел у трох рэвалюцыях: Рэвалюцыі на граніце і двух Майданах! У мяне толькі адно адзінае грамадзянства — украінскае, і ім ня ўдасца мяне яго пазбавіць!», — адзначыў Саакашвілі.
Ён дадаў, што ня будзе атрымліваць статус уцекача: «Цяпер мяне хочуць прымусіць атрымаць статус уцекача. Гэтага не будзе! Я буду дамагацца законнага права вярнуцца ва Ўкраіну», — адзначыў Саакашвілі.
Камісія па пытаньнях грамадзянства пры прэзыдэнце Ўкраіны разгледзела пытаньне аб грамадзянстве Міхэіла Саакашвілі, заяўляюць у Дзяржаўнай міграцыйнай службе. Таксама ў ведамстве адзначаюць, што прэзыдэнт выдаў указ пра страту грамадзянства. На сайце прэзыдэнта пакуль няма ўказу аб грамадзянстве Міхэіла Саакашвілі.
Ўкраінскае грамадзянства былы прэзыдэнт Грузіі Міхэіл Саакашвілі набыў у траўні 2015 года года ў адпаведнасьці з указам Пятра Парашэнкі, пасля гэтага яго прызначылі старшынёй Адэскай абласной дзяржадміністрацыі.
7 лістапада 2016 года Міхэіл Саакашвілі абвясьціў аб сваёй адстаўцы з пасады старшыні Адэскай абласной дзяржадміністрацыі. Ён патлумачыў гэтае рашэньне карупцыяй у рэгіёне, якую, паводле яго слоў, падтрымлівае ўлада Ўкраіны. У Грузіі, дзе цяперашняя ўлада абвінавачвае былога прэзыдэнта Саакашвілі ў шэрагу крымінальных злачынстваў, яго пазбавілі грамадзянства пасьля атрыманьня ім ўкраінскага.