Лінкі ўнівэрсальнага доступу

Сэнат Кангрэсу ЗША пачынае дэбаты аб адклiканьнi «закону Абамы»


Cэнатар-рэспубліканец Джон Маккейн выказаўся скэптычна ў дачыненьні адпрэчанага законапраекту

Верхняя палата Кангрэса ЗША Сэнат прагаласавала ў аўторак за тое, каб пачаць дэбаты наконт лёсу «Акту аб даступнай ахове здароўя», вядомым як «закон Абамы».

Вынікам гэтага працэсу можа стаць адмена рэформы сыстэмы мэдыцынскага страхаваньня, уведзенай падчас прэзыдэнцтва Барака Абамы.

Гэтае рашэньне было прынята перавагай у адзін голас пасьля некалькіх тыдняў актыўных абмеркаваньняў праекту перайначанай рэформы сыстэмы страхаваньня, зь якой выдалена некалькі ключавых палажэньняў цяперашняга «Акту аб даступнай ахове здароўя».

Сэнатар-дэмакраты аднадушна выступаюць супраць адклiканьня «закону Абамы». Сярод рэспубліканцаў, якія валодаюць мінімальнай большасьцю ў Сэнаце, няма адзінай думкі пра гэты законапраект. Некалькі чалавек лічаць, што яго ўвасабленьне не прывядзе да ажыцьцяўленьня заяўленай прэзыдэнтам Трампам і кіраўніцтвам рэспубліканскай партыі мэты — зьніжэньня росту кошту аховы здароўя і кошту страхавых полісаў. Каля дзясятка сэнатараў-рэспубліканцаў пагадзіліся прагаласаваць за пачатак дэбатаў толькі ў выніку ўгавораў прэзыдэнта Трампа, які настойвае на тым, што рэспубліканцы павінны выканаць адно з асноўных сваіх перадвыбарных абяцаньняў. Прэзыдэнт Трамп заявіў, што «Амэрыка наблізілася на адзін крок да вызваленьня ад кашмару «закону Абамы».

Фармальны працэс дэбатаў і перамоваў зацягнецца на некалькі дзён. У першым галасаваньні ў аўторак вечарам рэспубліканскі праект быў адхілены пераканаўчай большасьцю галасоў. Чакаецца, што рэспубліканцы неўзабаве вынесуць на галасаваньне новую вэрсію закону. У аўторак, выступаючы перад галасаваньнем, сэнатар-рэспубліканец Джон Маккейн выказаўся скэптычна ў дачыненьні адпрэчанага законапраекту, заявіўшы, тым не менш, аб падтрымцы ідэі адклiканьня «Акту аб даступнай ахове здароўя».

XS
SM
MD
LG