Лінкі ўнівэрсальнага доступу

Палата прадстаўнікоў Кангрэсу ЗША ўхваліла новыя санкцыі супраць Расеі


Палата прадстаўнікоў Кангрэсу ЗША 25 ліпеня прагаласавала за ўвядзеньне новых санкцый супраць Расеі.

Гэты законапраект падтрымалі 419 кангрэсмэнаў, супраць былі трое.

Цяпер Сэнат, які раней галасаваў за падобны законапраект, павінен падтрымаць дакумэнт, што паступіць з Палаты прадстаўнікоў. Пасьля ўхваленьня абедзьвюма палатамі законапраект цягам тыдня ляжа на стол прэзыдэнту Дональду Трампу.

У адміністрацыі Трампа заявілі, што прэзыдэнт яшчэ ня вырашыў, ці падпіша дакумэнт. «Хоць прэзыдэнт падтрымлівае жорсткія санкцыі супраць Паўночнай Карэі, Ірану і Расеі, Белы дом вывучае папраўкі і чакае іх паступленьня на прэзыдэнцкі стол», — сказала прэсавая сакратарка Белага дому Сара Сандэрс.

Абедзьве палаты маюць дастаткова галасоў, каб паўторна прагаласаваць за законапраект у выпадку магчымага вэта прэзыдэнта. Законапраект аб увядзеньні новых санкцый ЗША ў дачыненьні да Расеі з-за яе агрэсіі супраць Украіны, сярод іншага, прадугледжвае абмежаваньні на супрацоўніцтва кампаній і асоб з ЗША ня толькі непасрэдна з юрыдычнымі або фізычнымі асобамі, якія знаходзяцца пад санкцыямі, у першую чаргу ў Расеі, але і з кампаніямі або людзьмі з трэціх краін, якія ідуць на такое супрацоўніцтва з падсанкцыйнымі кампаніямі. Такім чынам, у цяперашнім выглядзе з дакумэнта вынікае, што пад санкцыі ЗША могуць патрапіць і тыя кампаніі ў ЭЗ, супрацоўніцтва якіх з Расіяй не парушае эўрапейскіх санкцый, але выходзіць за межы санкцый амэрыканскіх, якія павінен узмацніць новы закон.

У Эўрапейскім зьвязе выказалі занепакоенасьць з-за чаканага адабрэньня ў ЗША гэтага закона.

Законапраект тычыцца таксама Ірану і Паўночнай Карэі.

Ваша меркаваньне

Паказаць камэнтары

XS
SM
MD
LG