Лінкі ўнівэрсальнага доступу

Замчышча і стромкія берагі над Дняпром... Дзе ў Магілёве найлепшае месца пад помнік Купалу


Магілёўцам не хапае настойлівасьці, каб ушанаваць імя Янкі Купалы. Такая думка прагучала на першых Купалаўскіх чытаньнях, якія правяла магілёўская бібліятэка імя Янкі Купалы. Бібліятэкары прымеркавалі імпрэзу да 135-годзьдзя літаратара і грамадзкага дзеяча.

Удзельнікі чытаньняў гаварылі пра творчы шлях Купалы, яго стаўленьне да зьменлівага часу, у які ён жыў. Казалі, што цяперашнія рэаліі вымагаюць пераасэнсаваньня творчасьці пісьменьніка, якую старшыня абласной арганізацыі Таварыства беларускай мовы Яраслаў Клімуць ахарактарызаваў як аптымістычную. Згадвалі, якім быў Магілёў у часы Купалы. Адзначалі, што магілёўскае Падняпроўе і сам Магілёў трымаліся беларушчыны. Гісторык Ігар Пушкін назваў горад, якому Янка Купала прысьвяціў паэму «Магіла льва», самым беларускім на пачатку ХХ стагодзьдзя.

Галіна Жмачынская
Галіна Жмачынская

«Мы павінны папулярызаваць імя Янкі Купалы і ягоную творчасьць, каб яна не забывалася і была актуальная ва ўсе часы, — акрэсьліла асноўную ідэю дырэктарка бібліятэкі Галіна Жмачынская. — Плянуем, што чытаньні стануць традыцыйнымі. Нездарма сёньняшнія мы назвалі першымі. Хочам, каб наша бібліятэка стала асяродкам беларушчыны».

Акрамя бібліятэкі, у Магілёве імем Купалы названая вуліца ў адным са спальных раёнаў гораду. Заціснутая паміж завулкам Гогаля і вуліцай Кірава, яна нагадвае ўскраек райцэнтру, які абмінулі «Дажынкі» і Дні беларускай пісьменнасьці.

На думку гісторыка Ігара Пушкіна, грамадзкасьці варта падумаць, што зрабіць, каб у Магілёва зьявілася Купалава аблічча. Навуковец прапанаваў вярнуцца да гэтага пытаньня на наступных Купалаўскіх чытаньнях.

Адказваючы на пытаньне карэспандэнта Свабоды, ці дастаткова ўшанаванае ў Магілёве імя Янкі Купалы, гісторык Ігар Пушкін сказаў:

«Зваротам, якія дасылалі ў розныя часы з ініцыятывай увекавечыць як сьлед імя Купалы, ніхто не пярэчыў, але нам не хапае настойлівасьці».

Ігар Пушкін
Ігар Пушкін

«Была цудоўная ініцыятыва ўсталяваць помнік Янку Купалу, але, на жаль, ні ў Саюзу беларускіх пісьменьнікаў, ні ў Саюзу пісьменьнікаў Беларусі ды іншых арганізацый не хапіла настойлівасьці, каб давесьці справу да канца, — сказаў навуковец. — Трэба ня проста заявіць пра жаданьне, а яшчэ вызначыцца зь месцам, дзе бачыцца такі помнік, як ён будзе выглядаць. Таму я лічу, што ў Магілёве не хапае настойлівасьці саміх магілёўцаў у справе ўшанаваньня памяці Янкі Купалы».

Пра тое, што магілёўцам не хапае настойлівасьці, казала і яшчэ адна ўдзельніца Купалаўскіх чытаньняў, сябра ТБМ Алена Асмакоўская:

«Я паводле прафэсіі інжынэр-архітэктар, і, на маю думку, горад ужо падрыхтаваны да помніка Купалу, — сказала яна. — Наша замчышча і стромкія берагі над Дняпром — ці гэта ня помнік песьняру? Замчышча просіць паставіць там помнік Купалу. Гэтую мясьціну сама Беларусь падрыхтавала для помніка».

Алена Асмакоўская
Алена Асмакоўская

Пра ўсталяваньне помніка клясыку сёлета ўжо гаварыў старшыня гарадзкой арганізацыі ТБМ Алег Дзьячкоў. У сваім выступе на кінавечарыне, прысьвечанай юбілею Янкі Купалы і Якуба Коласа, актывіст таксама прапанаваў паставіць помнік на замчышчы.

Ваша меркаваньне

Паказаць камэнтары

XS
SM
MD
LG