Лінкі ўнівэрсальнага доступу

Дзяржкантроль пацьвердзіў затрыманьне бізнэсоўца Пузікава. СК: «Зьвесткамі не валодаем»


Віктар Пузікаў, архіўнае фота

Камітэт дзяржаўнага кантролю пацьвердзіў затрыманьне уласьніка дыспэтчарскай службы таксі «Алмаз 7788» Віктара Пузікава. Паводле Дзяржкантролю, Пузікаў не сплаціў больш як 1,4 млн рублёў падаткаў.

«Выяўлена, што дадзены кіраўнік цягам 2015-2017 гадоў рэгулярна атрымліваў ад афіцыйных і „нелегальных“ таксістаў, якім аказваў дыспэтчарскія паслугі таксі, наяўныя грашовыя сродкі, якія не адлюстроўваў у бухгальтарскім уліку арганізацыі. Гэта давала магчымасьць ўхіляцца ад выплаты падаткаў», — гаворыцца ў заяве камітэту.

Такая схема, паводле камітэту, задваляла ўласьніку службы штомесяц атрымліваць больш як 200 тысяч даляраў, а самой службе таксі заняць «адну з дамінуючых пазыцыяў на рынку» празь ніжэйшыя тарыфы.

Супраць Пузікава і трох меркаваных саўдзельнікаў (адзін зь іх таксама затрыманы) распачалі крымінальную справу за ўхіленьне ад падаткаў у асабліва буйным памеры (ч. 2 арт. 243 КК БР).

Арышт накладзены на 93 аўтамабілі службы, 30 аб’ектаў нерухомасьці і больш як 2 млн даляраў грошаў затрыманых.

Юлія Ганчарова з прэсавай службы Сьледчага камітэту сказала карэспандэнту Свабоды, што «Сьледчы камітэт не валодае зьвесткамі пра затрыманьне Пузікава». Тэлефоны прэсавых службаў КДБ і МУС маўчаць.

Паводле ранейшых зьвестак, Пузікаў быў затрыманы 13 чэрвеня. Пра гэта ў сацсетках паведаміў лідэр прадпрымальніцкай арганізацыі «Пэрспэктыва» Анатоль Шумчанка са спасылкай на таксістаў з «Алмаз 7788». Магчыма, разам з Пузікавым затрыманы ягоны намесьнік, нібыта справа ідзе аб нявыплаце падаткаў.

У адміністрацыі службы таксі «Алмаз 7788» супрацоўніца адказала, што там нікога з кіраўніцтва цяпер няма, інфармацыю пра затрыманьне Віктара Пузікава яна пацьвердзіць ня можа.

XS
SM
MD
LG