14 чэрвеня зь віцебскага ізалятара часовага ўтрыманьня выйшаў на волю праваабаронца Павал Левінаў, які па рашэньні суду правёў там 15 сутак адміністрацыйнага арышту.
Суд пакараў праваабаронцу за нібыта ўдзел у несанкцыянаваных акцыях 25 і 26 сакавіка. Павал Левінаў ішоў на суткі з мэтай правесьці маніторынг умоваў побыту ў ізалятары. Параўнальна з 2009 годам, калі Павал Левінаў адбываў там арышт, ён заўважыў паляпшэньне ўмоваў. Пра свае скаргі ён плянуе расказаць на адмысловай прэс-канфэрэнцыі.
Павал Левінаў сказаў, што атрымаў у ізалятары больш за 70 лістоў зь Беларусі і замежжа, дзе выказваюцца словы падтрымкі. Сярод іх ліст ад непаўналетняй дзяўчыны, якая напісала, што гэта сорам, ганьба, калі ў краіне арыштоўваюць такіх людзей, як Павал Левінаў.
З ізалятара Павал Левінаў вынес у тэчцы ўзор турэмнай ежы. Ён абяцае дома яго ўзважыць і спраўдзіць, наколькі ён адпавядае ня толькі санітарным нормам, але і коштам, якія мусіць сплаціць кожны вязень ІЧУ.
