Прэзыдэнт ЗША Дональд Трамп прызначыў адваката Крыстафэра Рэя новым дырэктарам Фэдэральнага бюро расьсьледаваньняў. На ацэнку аглядальнікаў, аўтарытэт Рэя высокі сярод заканадаўцаў ад абедзьвюх партый, і ягоная кандыдатура будзе бязь цяжкасьцяў ухваленая Сэнатам.
Прэзыдэнт абвясьціў пра сваё рашэньне праз «Твітэр», не апавясьціўшы загадзя аднапартыйцаў у Кангрэсе.
З 2003-га па 2005 год Крыстафэр Рэй узначальваў Сьледчы камітэт пры Генэральнай пракуратуры. Раней у якасьці пракурора займаўся раскрыцьцём тэрарыстычнай сеткі, якая мае дачыненьне да тэрактаў 11-га верасьня, і быў куратарам гучнай справы супраць карумпаваных кіраўнікоў кампаніі Enron, што абвясьціла банкруцтва. Сярод кліентаў Рэя ў бытнасьць яго прыватным адвакатам быў губэрнатар штату Нью-Джэрсі Крыс Крысьці.
Папярэднік Рэя на пасадзе дырэктара ФБР Джэймс Коўмі быў звольнены прэзыдэнтам Трампам 9-га траўня. У чацьвер, 8-га чэрвеня, Коўмі выступіць у сэнацкім Камітэце выведкі, які праводзіць расьсьледаваньне меркаванага ўмяшаньня Расеі ў леташнюю перадвыбарчую кампанію ў ЗША.