Лінкі ўнівэрсальнага доступу

На актывіста Кабанава склалі тры новыя пратаколы


Аляксандар Кабанаў

Адразу тры пратаколы міліцыя склала на сябра АГП зь Бярозы Аляксандра Кабанава.

Міліцыянты зь Бярозаўскага РАУС выклікалі актывіста яшчэ ў суботу 8 красавіка. Але Аляксандар Кабанаў зьявіўся ў пастарунку толькі 10-га, паколькі, зь яго слоў, у суботу меў сустрэчу ў Берасьці:

«Справы, паводле якіх я мусіў даць тлумачэньні, проста несур’ёзныя. Першая зь іх — нязначнае ДТЗ на аўто, якое нават мне не належыць. Там атрымалася зусім непрыкметная драпіна. Другая справа наагул вельмі дзіўная: аддзел прымусовага выкананьня чамусьці падаў мяне ў вышук. Я не разумею такой лёгікі. У РАУС тлумачыў, што не хаваюся ні ад кога. Сказаў міліцыянтам, у тым ліку і ўчастковаму, які быў у кабінэце, што калі мяне выклікаюць, то я заўсёды зьяўляюся ў РАУС. Ніхто мяне не прыводзіць гвалтам, але я сам прыходжу на патрабаваньне. Ды і наагул, я ж у турме сядзеў, адбываў адміністрацыйнае пакараньне зусім нядаўна. На якой падставе мяне шукаюць і чаму? Я не зразумеў. Што да трэцяга пратаколу, што быў складзены на мяне — то гэта тое, што я не зьявіўся ў суботу ў РАУС на позву. Я патлумачыў, што ў гэты дзень кантактаваў зь міліцыянтамі і паведамляў ім, што заключаю дамову з адвакатам, таму ня змог зьявіцца».

На думку Аляксандра Кабанава, гэта дробныя зачэпкі, непрыемныя, але міліцыянты відавочна выконваюць загад зьверху, перасьледуючы яго:

«Гэта зусім не ініцыятыва ўчастковага, як я зразумеў. Яны ведаюць, што я сустракаюся зь людзьмі, ежджу па розных гарадах вобласьці. Таму намагаюцца сарваць гэтыя сустрэчы. Але ж няма ў маіх дзеяньнях ніякага крыміналу. І раней праводзіў сустрэчы, а вось цяпер раптам яны сталі небясьпечныя чамусьці. А гэтыя зачэпкі — проста фармальнасьці. Хоць, шчыра скажу, сёньня ў РАУС зьявіўся з сабранымі рэчамі. МІліцыянты яшчэ запыталіся, маўляў, навошта яны табе. На што я адказаў, што калі мяне апошнім часам выклікаюць, то я апынаюся за кратамі. Яны пачалі апраўдвацца, казаць, што ў позьве ж напісана, што выклікаюць мяне для таго, каб правесьці размову, апытаньне скласьці. Таму мне не да жартаў цяпер».

XS
SM
MD
LG