Лінкі ўнівэрсальнага доступу

Пасьля аршанскага «Маршу недармаедаў»: каля 20-ці затрыманых, заўтра чакаюцца 8 судоў


Акцыя ў Воршы

Аршанскага актывіста кампаніі «Гавары праўду» Ігара Грышанава затрымалі яшчэ да пачатку маршу: з учорашняга вечара яму тэлефанавалі міліцыянты, запрашаючы «на размову».

Бяз позвы ў пастарунак спадар Грышанаў ісьці адмовіўся, а каля 10.30 ягоную машыну спынілі на запраўцы. Актывіста затрымалі, прычына, якую сфармулявалі міліцыянты, пакуль не вядомая. Тэлефон Ігара Грышанава не адказвае. Сябры-аднадумцы кажуць, што ён пасьпеў ім паведаміць толькі адно: суд над ім адбудзецца заўтра ў 11 гадзінаў.

Дакладны час суду над тымі, каго затрымалі ўжо пасьля «Маршу недармаедаў», пакуль невядомы. Каля двух дзясяткаў удзельнікаў маршу некалькі гадзін чакалі зьвестак каля аршанскага адзьдзелу міліцыі, куды трапілі Павал Севярынец і кіроўца машыны, на якой абодва зьбіраліся ад’яжджаць у Менск, актывіст з Дрыбіна Андрэй Юркоў, аршанскія актывісты Віктар Міхасёў, Віктар Андрэеў, які быў адным з самых імпэтных выступоўцаў, і Васіль Берасьнеў, вядоўца мітынгу на цэнтральнай плошчы.

Выступае Васіль Берасьнеў, затрыманы з ўдзел у "Маршы недармаедаў"
Выступае Васіль Берасьнеў, затрыманы з ўдзел у "Маршы недармаедаў"



Паводле актывіста аргкамітэту па стварэньні партыі БХД Яўгена Анішчанкі, па стане на 18.45 у пастарунку знаходзіліся яшчэ дзьве журналісткі — Галіна Абакунчык з Радыё Свабода і Кацярына Бахвалава зь Белсату. Яўген Анішчанка і сам быў затрыманы перад сёньняшняй акцыяй, а потым сачыў за лёсамі іншых:

«Я ехаў у „маршрутцы“ і ўбачыў, як міліцыянты затрымліваюць Васіля Берасьнева. Выйшаў і паехаў разам зь ім у пастарунак. Там ужо былі іншыя затрыманыя, у тым ліку і журналістка Катарына Андрэева. Пакуль мы спрабавалі даведацца, што будзе з затрыманымі, прывезьлі і журналістку Галіну Абакунчык. Сказалі, што ўсе яны затрыманы да заўтра, а заўтра будзе суд. У колькі , дакладна не вядома, але суд пачынае працу з 9.00, і мы туды зьбіраемся. Міліцыянты адмовіліся ўзяць нават ваду для затрыманых. Сказалі, што перадачы ў ізалятары часовага ўтрыманьня прымаюцца да 18.00».

Яўген Анішчанка быў атрыманы сёньня да пачатку акцыі: міліцыянты адсачылі ягоную машыну, дзе актывіст перавозіў гукаўзмацняльную апаратуру. Паводле ягоных словаў, супрацоўнікі міліцыі наладзілі сапраўдную аблогу: шукалі актывіста з апаратурай па трох адрэсах, уключаючы бацькоў і бліжэйшых сваякоў.

Нешта падобнае сёньня адбылося і з актывістам партыі БНФ Ігарам Казьмерчаком: яго таксама шукалі па адрэсах сваякоў.

Яшчэ некалькі чалавек не змаглі прыйсьці сёньня на «Марш недармаедаў», бо каля іхных кватэраў дзяжурылі нарады міліцыі.
У сябра БСДП (Грамада) Канстанціна Анташкевіча і незалежнага журналіста Арцёма Сізінцава сёньня ўраньні адбыліся ператрусы. Паводле пастановаў, яны тычыліся справы аб вырабе фальшывых грошай, праз якую днямі быў праведзены ператрус і ў офісе аршанскай Кааліцыі дэмакратычных сілаў. На офісе была сканфіскаваная аргтэхніка, а вось з кватэраў актывістаў міліцыянты не ўзялі нічога. Аднак дапытвалі пасьля ператрусу роўна да таго часу, пакуль у горадзе ня скончыўся марш.

Сёньня раніцай на аршанскім чыгуначным вакзале былі затрыманыя некалькі журналістаў зь Менску і Віцебску. Віцебскіх калег Тацяну Мацьвееву, Ігара Мацьвеева і Сяргея Серабро адпусьцілі яшчэ да на пачатку акцыі, а менскіх журналістаў Дар’ю Гуштын і Сяргея Гудзіліна — пазьней, так што яны пасьпелі толькі да сканчэньня маршу на прыступках Аршанскага райвыканкама. Яшчэ двое журналістаў зь Віцебску, Уладзімер Лунёў і Сяргей Русецкі, у Воршу так і ня трапілі: машыну, у якой яны ехалі, спынілі на выезьдзе з абласнога цэнтру і амаль тры гадзіны высьвятлялі, ці яна не скрадзеная.

Затрыманьні ў Воршы сталі ці ня самымі масавымі за ўвесь час, пакуль «Маршы недармаедаў» праходзілі па ўсёй Беларусі.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG