Лінкі ўнівэрсальнага доступу

Ноч у Курапатах прайшла спакойна, будаўніцтва не аднавілася. Фота і відэа


У лягеры абаронцаў Курапатаў ля будаўнічай пляцоўкі ў Зялёным Лузе побач з мэмарыялам «Курапаты» ноччу заставалася каля 20 чалавек.

Восьмая ноч у лягеры абаронцаў Курапатаў прайшла без інцыдэнтаў. Людзі па чарзе дзяжурылі і адпачывалі ў намётах.

Цяпер удзельнікі абароны Курапатаў рыхтуюцца да абвешчанай на 8.00 мабілізацыі, часу калі могуць прыйсьці будаўнікі.

А 8.00 ў лягеры абаронцаў пачаўся мітынг, на якім першым выступіў паэт Уладзімер Някляеў, які чытаў вершы.

Пазьней выступіў лідэр абаронцаў Зьміцер Дашкевіч, ён паведаміў, што а 7 раніцы з будпляцоўкі зьехаў экскаватар, кіроўца якога яму сказаў, што некалькі дзён працы тут ня будзе.

Зьміцер Дашкевіч (у цэнтры)
Зьміцер Дашкевіч (у цэнтры)

«Мне вядома, што нас не будуць чапаць, хіба захочуць узяць на змор», — сказаў Дашкевіч, але заклікаў заставацца:

«Працы прыпыненыя, у любы момант, калі яны будаўнічыя працы адновяцца, мы зможам супрацьстаяць».

Учора частка будаўнікоў забрала з бытовак свае рэчы, частка тэхнікі была адведзеная з будаўнічай пляцоўкі.

Пляцоўка пад будаўніцтва была прададзеная на аўкцыёне ў 2013 годзе, калі яна знаходзілася ў ахоўнай зоне гісторыка-культурнай каштоўнасьці. Толькі ў канцы 2014 году пляцоўку вывелі з ахоўнай зоны. Будоўля распачалася 16 лютага 2017 году.

За паўтара месяца да пачатку будаўніцтва мясцовыя жыхары сабралі подпісы ў адміністрацыю Лукашэнкі, але не атрымалі адтуль адказу ў вызначаны законам тэрмін. Жыхары выклікалі міліцыю на будаўнічую пляцоўку, але гэта не спыніла будаўніцтва.

З 20 лютага актывісты апазыцыі і мясцовыя жыхары пачалі бестэрміновую акцыю пратэсту супраць будаўніцтва офіснага цэнтру паблізу мэмарыялу.

Ваша меркаваньне

Паказаць камэнтары

XS
SM
MD
LG