Сьвіньні жывыя, прадукцыя са сьвініны, пшаніца, жыта, ячмень, авёс, кукуруза, соевыя бабы, мука, кансэрвы зь мяса, макарона, сыры, вотрубʼе, макуха, прадукты расьліннага паходжаньня ды іншыя — усе гэтыя прадукты трапілі ў пералік падкантрольных тавараў, на якія трэба будзе мець дазвол на ўвоз у Расею, паведамляе Рассельгаснагляд.
Такое рашэньне тлумачыцца, тым, што са студзеня 2015 году беларускі бок пашырыў пералік расейскай жывёлагадоўчай прадукцыі, у дачыненьні да якой прымяняюцца спэцыяльныя дадатковыя захады ў выглядзе дазволу на ўвоз, якi выдаецца вэтэрынарнай службай Рэспублікі Беларусь. Гэты захад быў зроблены ў сувязі зь нядобранадзейнасьцю Расеі ў дачыненьні захворваньняў жывёл на яшчур, птушыны грып і афрыканскую чуму сьвіней.
Расейскае ведамства адзначае, што ў гэты пералік уключаны, акрамя сьвінагадоўчай прадукцыі, таксама і тавары, якія ў нязначнай колькасьці зьмяшчаюць прадукты перапрацоўкі сьвініны, а таксама што заканадаўствам ЭАЭС не прадугледжана афармленьне такіх дазволаў на ўвоз пры перамяшчэньні прадукцыі паміж краінамі.
«З прычынаў, якія ня маюць навуковага абгрунтаваньня, дазвол на ўвоз цяпер патрабуецца і на прадукцыю, якая ня можа несьці рызыкі распаўсюджваньня афрыканскай чумы сьвіней (корм для жывёл, у тым ліку для сабак ці катоў, арганічныя хімічныя злучэньні і фармацэўтычная прадукцыя для прымяненьня ў вэтэрынарыі).
Рассельгаснагляд неаднаразова зьвяртаўся да беларускага боку з просьбай адмяніць дыскрымінацыйныя захады ці даць навуковае абгрунтаваньне ў дачыненьні да вышэйпералічаных групаў тавараў.
Ніякай інфармацыі пра станоўчае вырашэньне гэтага пытаньня ад беларускага боку ў адрас Рассельгаснагляду так і не паступіла», канстатуюць у Рассельгаснаглядзе.
«Харчовая вайна» паміж Расеяй і Беларусьсю абвастрылася ў пачатку 2017 году. Падчас «Вялікай размовы з прэзыдэнтам» 3 лютага Лукашэнка выказаўся наконт прэтэнзіяў Масквы да беларускіх прадуктаў і нават паабяцаў распачаць крымінальную справу супраць кіраўніка Рассельнаснагляду Сяргея Данкверта за «нанясеньне шкоды дзяржаве».
З 4 па 6 лютага 2017 году «Рассельгаснагляд» у Бранскай і Смаленскай абласьцях забараніў увоз больш як 37 тон ялавічыны зь беларускіх мясакамбінатаў у Любані і Магілёве.
З 6 лютага Рассельгаснагляд увёў часовыя абмежаваньні на пастаўкі ялавічыны і ялавічных субпрадуктаў з усіх прадпрыемстваў Менскай вобласьці Беларусі, а таксама некаторых з Магілёўскай вобласьці. Сярод прычын называліся падазрэньні ў тым, што беларускія прадпрыемствы прадаюць у Расею мяса ўкраінскага паходжаньня.
8 лютага Рассельгаснагляд паведаміў, што ў студзені на мяжы спынены ўвоз зь Беларусі ў Расею больш як 40 партыяў малочнай і мясной прадукцыі беларускага паходжаньня.
9 лютага Рассельгаснагляд распаўсюдзіў заяву пра адкладаньне візыту сваіх спэцыялістаў у Беларусь, якія меліся праверыць месцы захоўваньня і вытворчасьці расьліннай прадукцыі. Прычына адкладаньня візыту — магчымыя «правакацыйныя дзеяньні зь беларускага боку».
