Паводле рашэньня Лідзкага раённага суду, Валеры Мінец быў прызнаны вінаватым ва ўдзеле ў незаконным масавым мерапрыемстве 30 кастрычніка мінулага году ў Сьвіслачы. У сваёй скарзе ў абласны суд Мінец напісаў, што рашэньня Лідзкага раённага не прызнае.
Перад абласным судзьдзём ён яшчэ раз патлумачыў, што падчас разгляду справы сьведкі-міліцыянты лжыва сьведчылі супраць яго. На мерапрыемства ён спазьніўся і прыехаў у Якушоўку пасьля таго, як яно было скончанае. Аб гэтым, паводле Мінца, сьведчаць і запісы на некалькіх відэакамэрах міліцыянтаў — Мінца не было ні на адным з запісаў.
«Калі мерапрыемства скончылася і ўжо нават былі выключаныя міліцэйскія камэры, я быў яшчэ кілямэтраў за 20 ад Якушоўкі. Не адмаўляю, што прыехаў туды і сфатаграфаваўся побач з крыжам, што стаіць на сядзібе Каліноўскіх. Але гэта ўся мая датычнасьць да таго, што ў судзе назвалі незаконным масавым мерапрыемствам», — сказаў у абласным судзе Валеры Мінец.
Мінец таксама абгрунтаваў неаб’ектыўнасьць разгляду раённым судом ягонай справы тым, што лідзкі судзьдзя Сяргей Піпка не задаволіў ягонага хадайніцтва запрасіць у кампаніі Velсom геалякацыйныя дадзеныя ягонага пахвіліннага знаходжаньня на той час, калі адбываліся мерапрыемствы ў Якушоўцы.
Судзьдзя абласнога суду Рачынскі не прыняў гэта да ўвагі і пакінуў рашэньне Лідзкага суду бязь зьмены.
Валеры Мінец, камэнтуючы Свабодзе рашэньне Гарадзенскага абласнога суду, зазначыў, што яно было чаканым.
«Ну гэта ж відавочна, што дастаткова было хоць крыху ўнікнуць у справу, запрасіць тыя самыя дадзеныя геалякацыі, і гэта было б больш дакладным сьведчаньнем, чым тое, што казалі сьведкі-міліцыянты. Але гэта судзьдзі было не патрэбна. Працягваецца ціск улады на любых палітычна актыўных людзей, вядзецца палітыка запалохваньня і штрафаў-спагнаньняў у дачыненьні іх. І гэта падкрэсьлівае, што мы дзейнічаем у правільным кірунку, а гэтая ўлада нас баіцца».
Праваабаронца Ўладзімер Хільмановіч, які прысутнічаў у судзе, зазначыў, што гэта ўжо сёмая скарга на прысуды за ўшанаваньне паўстанцаў 1863 году ў Сьвіслачы. Паводле яго, суды вынесьлі рашэньні, штрафы па якіх складаюць больш як 4 тысячы даляраў, і спадзявацца на іх адмену няма ніякага сэнсу. Але, паводле яго, многія настроены давесьці справу да Камітэта правоў чалавека пры ААН.
Паводле маніторынгу гарадзенскіх праваабаронцаў, за ўшанаваньне паўстанцаў Каліноўскага ў Сьвіслачы ў 2016 годзе аштрафавалі 18 чалавек.
