Дэманстранты сабраліся ў Бэтэры-парку ў Нью-Ёрку, каб асудзіць ўказ пра абмежаваньні на ўезд у ЗША мігрантаў і ўцекачоў зь сямі пераважна мусульманскіх краінаў.
Лідэр дэмакратычнай меншасьці ў Сэнаце Чак Шумэр, выступаючы перад актывістамі, назваў указ «неамэрыканскім».
«Тое, пра што мы тут гаворым, зьяўляецца пытаньнем жыцьця і сьмерці для многіх людзей», — сказаў Шумэр.
Больш за 10 чалавек прыйшлі ў цэнтар Бостану з пратэстамі.
Тысячы незадаволеных іміграцыйнымі абмежаваньнямі сабраліся каля Белага дома ў Вашынгтоне, скандуючы: «Дазвольце ім ўехаць», некаторыя выкрыквалі: «Мы ўсе мусульмане».
Людзі ў амэрыканскай сталіцы прайшлі маршам да гатэлю Трампа, разьмешчанага за некалькі кварталаў ад Капітолію.
Мітынгі таксама заплянаваныя і ў іншых амэрыканскіх гарадах, у тым ліку Г’юстане, Дэтройце, Сэнт-Луісе і Лос-Анджэлесе.
Паведамляецца, што новыя іміграцыйныя абмежаваньні ўжо прывялі да затрыманьня або дэпартацыі сотняў людзей, якія прыбываюць у аэрапорты ЗША.
Прэзыдэнт ЗША Дональд Трамп, спасылаючыся на неабходнасьць абараняць ЗША ад «замежных тэрарыстаў», падпісаў у пятніцу шэраг указаў пра абмежаваньні на іміграцыю. У прыватнасьці, мусульмане — грамадзяне Сырыі, Ірану, Іраку, Лібіі, Самалі, Судану і Емэну на 90 дзён страчваюць права ўезду ў ЗША, і нават тыя зь іх, хто мае «грын-карты».
Акрамя таго, Трамп на 4 месяцы спыніў дзеяньне амэрыканскай праграмы прыняцьця ўцекачоў і зь іншых краінаў, акрамя згаданых сямі, і ўдвая, да 50 тысяч, скараціў лік уцекачоў, якіх ЗША прымуць сёлета з усяго сьвету.
Гэтыя рашэньні выклікалі рэзкую крытыку ня толькі праваабаронцаў і грамадзянскіх актывістаў, але і ўрадаў краін — саюзьніц ЗША ў Эўропе, не кажучы пра краіны, якіх тычацца абмежаваньні.
