Актывісты «Маладога фронту» Зьміцер Дашкевіч, Арцём Леўчанка і Павал Пракаповіч у навагоднюю ноч былі затрыманыя супрацоўнікамі міліцыі і прыблізна пяць гадзін правялі ў Першамайскім РУУС Менску.
Падставай для затрыманьня стаў намер маладафронтаўцаў сустрэць Новы год на Кастрычніцкай плошчы пад бел-чырвона-белымі сьцягамі, пра што яны абвясьцілі ў сацсетках.
Як расказаў БелаПАН Дашкевіч, за домам, дзе ён жыве, назіралі супрацоўнікі сілавых структур у чатырох мікрааўтобусах. Дашкевіча міліцыя спыніла прыкладна ў 23:30 на скрыжаваньні вуліц Чарнышэўскага і Якуба Коласа. «Затрыманьне праходзіла вельмі акуратна — супрацоўнікі АМАПу падышлі, назваліся», — адзначыў Дашкевіч.
Леўчанка і Пракаповіч былі затрыманыя ў раёне Нацыянальнай акадэміі навук. «На праспэкце міліцыя перагарадзіла дарогу таксі, у якім яны ехалі, выцягнулі іх, надзелі кайданкі», — сказаў Дашкевіч.
У Першамайскім РУУС у дачыненьні да яго склалі пратакол аб непадпарадкаваньні патрабаваньням міліцыі. Аналягічныя пратаколы былі складзеныя на Леўчанку і Пракаповіча, але іх яшчэ абвінавацілі ў нецэнзурнай лаянцы.
У РУУС у затрыманых канфіскавалі 10 бел-чырвона-белых сьцягоў і 2,5 тысячы каляндарыкаў з нацыянальнай сымболікай і надпісам: «2017 — 500 год беларускай Бібліі».
