Ленінскі суд гораду Кірава 5 сьнежня прыступае да паўторнага разгляду так званай справы «Кировлеса» ў дачыненьні да лідэра Фонду барацьбы з карупцыяй Аляксея Навальнага і прадпрымальніка Пятра Афіцэрава.
Рашэньне пра паўторны разгляд справы было прынятае ў сярэдзіне лістапада — тады Вярхоўны суд Расеі адмяніў прысуд, вынесены тры гады таму, і адправіў справу на новы разгляд. Паводле вэрсіі абвінавачаньня, Навальны, быўшы дарадцам губэрнатара Кіраўскай вобласьці, сумесна з Афіцэравым арганізаваў крадзеж дзесяці тысяч кубамэтраў лесу, і гэта нанесла шкоду бюджэту Кіраўскай вобласьці ў памеры 16 мільёнаў рублёў.