Кіраўнік НАТО Енс Столтэнбэрг заявіў пра гатоўнасьць кіраўніцтва Паўночнаатлянтычнага саюза правесьці афіцыйныя перамовы з Расеяй непасрэдна пасьля завяршэньня варшаўскага саміту НАТО ў канцы гэтага тыдня.
Папярэдняя сустрэча чальцоў Рады НАТО-Расеі праходзіла ў красавіку гэтага году пасьля амаль двухгадовага перапынку. Па выніках сустрэчы было абвешчана пра глыбокія разыходжаньні паміж бакамі — перш за ўсё па пытаньні аб урэгуляваньні крызісу на ўсходзе Ўкраіны.
Рада НАТО-Расея важная як форум для дыялёгу, падчас якога можна было б дасягнуць большай прадказальнасьці ў адносінах паміж бакамі, сказаў Столтэнбэрг журналістам 4 ліпеня.
Сярод пытаньняў парадку дня саміту — разьмяшчэньне чатырох батальёнаў НАТО на тэрыторыі Польшчы, Літвы, Латвіі і Эстоніі.
Адносіны паміж НАТО і Расеяй дасягнулі самага нізкага ўзроўню з часоў «халоднай вайны» — у сувязі з расейскай анэксіяй Крыму і роляй Масквы ў канфлікце на ўсходзе Ўкраіны.