Шасьцёра міратворцаў загінулі ў выніку нападу баевікоў на базу ААН у горадзе Кідаль на поўначы Малі, паведамляе Бі-бі-сі.
Адказнасьць за напад узяла на сябе групоўка «Ансар ад-Дын», якая зьяўляецца галіной «Аль-Каіды» ў краінах ісламскага Магрыба.
Баевікі атакавалі базу міратворцаў у пятніцу раніцай на аўтамабілі, гружаным выбухоўкай, а затым абстралялі лягер зь мінамётаў.
Загінулыя міратворцы — грамадзяне Гвінеі. Паводле зьвестак ААН, каля 30 чалавек атрымалі раненьні.
Генэральны сакратар ААН Пан Гі Мун назваў напад на міратворцаў ваенным злачынствам і заявіў, што ААН не адмовіцца ад дапамогі ўраду Малі ў барацьбе з ісламістамі на поўначы краіны.
Місія ў Малі — найбольш небясьпечная з усіх міратворчых місій, якія цяпер вядзе ААН. Арганізацыя спрабуе аднавіць мір на поўначы краіны. У 2012 годзе гэты рэгіён быў захоплены джыхадзістамі і іх прыхільнікамі — сэпаратыстамі-туарэгамі.
