Лінкі ўнівэрсальнага доступу

Сьвятлана Алексіевіч атрымала Нобэлеўскую прэмію. Жывая трансьляцыя

абноўлена

Беларуская пісьменьніца атрымала Нобэлеўскую прэмію з рук швэдзкага караля Карла Густава ХVI.


Коратка

Беларуская пісьменьніца атрымала Нобэлеўскую прэмію з рук швэдзкага караля Карла Густава ХVI. Чакаюцца дзьвюххвілінныя банкетныя прамовы кожнага зь ляўрэатаў.

Узнагароджаньне адбылося ў Стакгольмскай канцэртнай залі, пачатак у 18:30 паводле беларускага часу. Спачатку выступіў старшыня Нобэлеўскага камітэту Касі Кулман Файв, а потым кароль Швэцыі Карл Густаў ХVI уручыць кожнаму ляўрэату адмысловы мэдаль з выявай Альфрэда Нобэля і дыплём. А 21-й, паводле беларускага часу, — банкет у Блакітнай залі Стакгольмскай ратушы. «У банкетнай прамове будзе пра Беларусь», — сказала ляўрэатка Нобэлеўскай прэміі па літаратуры Сьвятлана Алексіевіч журналістам напярэдадні, 9 сьнежня, адказваючы на папрокі крытыкаў яе Нобэлеўскай лекцыі.

Праз паўгадзіны пачнецца ўрачыстая цырымонія ўзнагароджаньня ляўрэатаў Нобэлеўскай прэміі. Сярод тых, хто атрымае ўзнагароду з рук караля Швэцыі Карла Густава XVI будзе і пісьменьніца Сьвятлана Алексіевіч. Са Стакгольму перадае карэспандэнтка Свабоды Аляксандра Дынько.

Дзяржаўныя тэлеканалы праігнаравалі нобэлеўскую лекцыю Алексіевіч — праігнаруюць і цяперашнюю цырымонію. Падчас яе глядзіце навіны і «Зону ікс» на «Беларусь-1», сэрыял «Бафі» на «Беларусь-2», «Бацькавы дочкі» і Малахава на АНТ. А Нобэля давядзецца глядзець празь Youtube, на «Белсаце», альбо ў кавярнях і барах свайго гораду. Запрашала да сябе і амбасада ЗША ў Менску.

Празь ігнараваньне Нобэлеўскай прэміі Беларусь апынулася ў адным сьпісе з нацысцкай Нямеччынай, М’янмай і СССР. Паглядзіце, на каго з нобэлеўскіх ляўрэатаў не зьвярталі ўвагу іх дзяржавы.

Некаторыя крытыкавалі Алексіевіч за тое, што ў нобэлеўскай лекцыі яна распавядала пра тое, за што атрымала прэмію, а не пра праблемы Беларусі, ды распавядала не па-беларуску. «Калі дапусьціць, што Сьвятлана Алексіевіч — таксама „рускі сьвет“, то дзякуй Богу. Хай такі „сьвет“ будзе, нам ад яго не адгарадзіцца, і няхай ён будзе такім, якая ёсьць Алексіевіч», — казаў Свабодзе пісьменьнік і паэт Уладзімер Някляеў. «Што, я мела крычаць „Жыве Беларусь“ і скакаць на кані?», — адказвала Алексіевіч на крытыку. У сёньняшняй прамове яна абяцала казаць пра Беларусь.

Дарэчы, расейскія крытыкі назвалі Нобэлеўскую лекцыю Алексіевіч «пуставатай» і «вясковай прозай». Сама Алексіевіч у інтэрвію Euronews казала, што Нобэль беларускаму пісьменьніку стаў для расейцаў нечаканасьцю.

Тым часам прэзыдэнт Швэдзкага ПЭН-цэнтру казаў літаральна наступнае: «Такія пісьменьнікі, як Алексіевіч, ствараюць для нас новую мову».

А калі Алексіевіч наведала школу ў эмігранцкім прыгарадзе Стакгольму, пра яе казалі «Яна сьмелая. Вельмі сьмелая».

«Літаратурная Беларусь» заглыбілася ў архіў «Саюзу беларускіх пісьменьнікаў», каб даведацца пра пачатак творчай дарогі будучай набэліянткі. Паглядзіце, як за яе ў 80-я змагаліся Алесь Адамовіч, Янка Брыль, Васіль Быкаў і іншыя. Разьвіцьцё тэмы — у выпуску перадачы «Вольная студыя» «Чаму Алексіевіч не прымалі ў Саюз пісьменьнікаў?»

А ў хуткім часе ў швэдзкім Каралеўскім драматычным тэатры зорка Швэдзкага тэлебачаньня Лена Эндрэ возьме ўдзел у публічнай прэм’еры радыёп’есы паводле кнігі Сьвятланы Алексіевіч «Час сэканд-Хэнд».

Цяпер афіцыйна: "У сувязі з наяўнасьцю пэўных арганізацыйна-тэхнічных, фінансавых і прававых пытаньняў, Белтэлерадыёкампанія не плянавала набыцьцё правоў на прамую трансьляцыю цырымоніі ўручэньня Нобэлеўскай прэміі за 2015 год".

Першыя кадры зь Сьвятланай Алексіевіч.

Загрузіць яшчэ

Глядзець камэнтары (8)

Гэтая дыскусія закрытая.
XS
SM
MD
LG