Расейскія кіроўцы-дальнабойнікі зьбіраюцца правесьці ў пятніцу 4 сьнежня буйную акцыю пратэсту з патрабаваньнем адмяніць рашэньне ўраду аб уводзе ў дзеяньне сыстэмы аплаты праезду «Платон».
Як паведамляюць расейскія мэдыі, асноўны пункт канцэнтрацыі вялікагрузных аўтамабіляў, якія ўдзельнічаюць у акцыі, знаходзіцца прыкладна ў 30 кілямэтрах ад Масквы.
Кіроўцы чакаюць, што да іх далучацца калегі з Пецярбургу, і маюць намер чакаць іх на працягу 10-12 гадзін. Аднак паліцыя рэгулярна зьвяртаецца да прысутных з просьбай «разьехацца», паколькі на адным месцы нібыта нельга доўга стаяць.
Падрабязнасьці маючай адбыцца акцыі не паведамляюцца.
Незадаволенасьць кіроўцаў сыстэмай «Платон» праяўляецца зь сярэдзіны лістапада ў выглядзе сходаў і мітынгаў.
На працягу апошніх сутак выказваліся здагадкі, што акцыя кіроўцаў можа быць адмененая, калі прэзыдэнт Расеі Пуцін, выступаючы са штогадовым зваротам да Фэдэральнага сходу, згадае праблему збору з вялікагрузнага транспарту. Як адзначае сайт «Медуза», Пуцін у сваім выступе гэтага не зрабіў.
У Расеі з 15 лістапада ўведзеная плата за праезд аўтамабіляў масай больш за 12 тон па фэдэральных трасах. Збор праводзіцца праз сыстэму, якая атрымала назву «Платон». Дальнабойнікі ў сувязі з увядзеньнем платы пачалі агульнарасейскія акцыі пратэсту.
