Лінкі ўнівэрсальнага доступу

Лукашэнка ў ААН казаў пра маральныя каштоўнасьці, цытаваў Эйнштэйна і Мандэлу


У Нью-Ёрку Аляксандар Лукашэнка выступіў у агульнай дыскусіі на 70-й сэсіі Генасамблеі ААН.

«З поўнай упэўненасьцю магу запэўніць усіх, што анархіі, бязьмежжу і гвалту ніколі ня будзе месца на беларускай зямлі — ні пад якімі лёзунгамі, у тым ліку дэмакратыі. Мы дастаткова моцныя і ўпэўненыя ў сабе, каб не дапусьціць іх прыходу да нас звонку! Стабільная Беларусь па-ранейшаму будзе заставацца донарам рэгіянальнай і міжнароднай бясьпекі», — заявіў кіраўнік Беларусі.

Падчас выступу ён пазначыў шэраг глябальных праблемаў, якія, на яго думку, стаяць перад сусьветнай супольнасьцю. Па-першае, гэта «беспрэцэдэнтная напружанасьць у міжнародных адносінах». Паводле слоў Лукашэнкі, «нельга пазбавіцца ад адчуваньня, што ў сьвеце маячыць прывід чарговага вялікага канфлікту, калі не вайны». Па-другое, гэта глябальныя эканамічныя пагрозы (тут Лукашэнка зноў загаварыў пра «інтэграцыю інтэграцый»). Па-трэцяе, гэта пагрозы ў сацыяльнай, гуманітарнай і экалягічнай сфэрах.

«Задумваючыся над падобнымі праблемамі, нельга не прыйсьці да адной думкі. Падобна на тое, што глыбінная крыніца гэтых крызісаў і пагрозаў адна: штучны культ індывідуальных правоў і свабодаў чалавека на шкоду грамадзкім інтарэсам. Прыкрываючыся лёзунгам правоў чалавека, апраўдваюцца зьвяржэньне урадаў, разбурэньне дзяржаў і войны за рэсурсы. Насаджаюцца мэтады хаосу і анархіі. Культывуюцца драпежніцкае стаўленьне да прыроды і імкненьне да нажывы», — заявіў Лукашэнка.

Ён асобна закрануў тэму працэсаў «разбурэньня традыцыйнай сям’і», якія адбываюцца ў шэрагу краінаў.

«Асабліва не падабаецца, калі нам прапануюць прызнаць пэўныя адступленьні ад нормаў маралі і розныя сацыяльныя „навацыі“ ў якасьці натуральных. Не хачу паглыбляцца ў гэтую праблему. Баюся ўгразнуць і потым падвергнуцца залішняй крытыцы, але так і хочацца пры гэтым спытаць: дзяцей-то хто нараджаць будзе? Мы зробім усё, што ад нас залежыць, каб нашы ўнукі, праўнукі і іх нашчадкі захавалі прынятыя народам маральныя каштоўнасьці, добрыя традыцыі духоўнасьці і культуры», — падкрэсьліў Лукашэнка.

Падчас выступу Лукашэнка двойчы цытаваў вядомых гістарычных асобаў. Спачатку былі працытаваныя словы Эйнштэйна: «Мір нельга ўтрымаць сілай, міру можна дамагчыся толькі праз разуменьне». А ў самым канцы выступленьня Лукашэнка прывёў словы Нэльсана Мандэлы: «Часам на пакаленьне выпадае лёс стаць вялікім. Вы можаце стаць гэтым пакаленьнем».

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG