Намесьніца прэсавага сакратара Дзярждэпартамэнта Мэры Харф заявіла аб тым, што сілы сэпаратыстаў пераносяць баявыя дзеяньні за межы зоны разьдзяленьня сілаў, што супрацьстаяць у Данбасе.
«Мы працягваем быць сьведкамі ўсё большай неадпаведнасьці паміж тым, што Расея і сэпаратысты заяўляюць, і тым, што яны робяць», — падкрэсьліла Мэры Харф. У якасьці прыкладаў яна згадала атаку на перадмаставыя ўмацаваньні ў паўночным Луганску і напад сэпаратыстаў на населены пункт Пяскі ў Данецкай вобласьці, дзе ў той момант знаходзіліся назіральнікі АБСЭ. Паводле прадстаўніцы дзярждэпартамэнта, у выніку нападу на Пяскі былі параненыя сем украінскіх вайскоўцаў, назіральнікі АБСЭ апынуліся ў небясьпецы.
«Расея і сэпаратысты, якіх яна падтрымлівае, будуць вымушаныя заплаціць больш высокую цану, калі яны ня выканаюць свае менскія абавязацельствы», — папярэдзіла прадстаўніца Дзярждэпартамэнта ЗША.
