За два тыдні да сьмерці расейскі апазыцыянер Барыс Нямцоў распавядаў пра свае засьцярогі, што прэзыдэнт Расеі Ўладзімір Пуцін «замовіць» яго за апазыцыйныя выказваньні. Ён казаў, што ды гэтага сваімі засьцярогамі дзяліўся з самымі блізкімі людзьмі. Прыводзім поўны тэкст кароткага інтэрвію Собеседника.
— Я ніколі не хаваў сваіх палітычных поглядаў, — для пачатку нагадаў Барыс Нямцоў у асабістай гутарцы з карэспандэнтам «Собеседника». — Лічу, што менавіта ён [Пуцін] разьвязаў вайну ва Ўкраіне. Стаўлюся да яго горш няма куды. Асабліва пасьля падзей «Норд-Осту» і Беслану.
Сваімі поглядамі палітык і грамадзкі дзяяч часьцей за ўсё, па яго прызнаньні, дзеліцца са сваёй мамай.
— Маю дарагую матулю клічуць Дзіна Якаўлеўна Эйдман, у сакавіку ёй, дай Бог, споўніцца 87 гадоў, — распавёў Барыс Нямцоў. — Яна заслужаны ўрач-пэдыятр, ужо даўно на пэнсіі, але ды гэтага часу цікавіцца ўсім, што зьвязанае з мэдыцынай. Яна пражыла вельмі цяжкае жыцьцё: падчас вайны, будучы школьніцай, рыла акопы, потым выхоўвала дваіх дзяцей. Зараз я жыву ў Маскве, а матуля ў Ніжнім Ноўгарадзе, адна, але пажывае выдатна. У яе сівых валасоў менш, чым у мяне, у яе няма склерозу, яна ў абсалютна здаровым розуме і яснай памяці. Абмяркоўваем зь ёй посьпехі маіх дзяцей і яе ўнукаў. Аб палітыцы з матуляй таксама пагаварыць вельмі любім. Яна катэгарычна супраць таго, што адбываецца ва Ўкраіне, лічыць, што гэтя катастрофа і поўны кашмар. Але больш за Ўкраіну яе хвалюе Пуцін. Кожны раз, калі я ёй тэлефаную, яна галосіць: "Калі ты спыніш лаяць Пуціна? Ён цябе заб’е!" І гэта на поўным сур’ёзе.
Да ВВП (Пуціна) яна ставіцца, натуральна, вельмі дрэнна — я ж яе сын, у рэшце рэшт. Мама мяне заўсёды прывучала ды таго, што трэба адстойваць свой пункт гледжаньня, быць незалежным і самастойным. На сваю галаву мяне такім выхавала, а цяпер абураецца, што я лаю Пуціна, які спрабуе ў нас з вамі адабраць свабоду. Яна рэальна баіцца, што ён мяне можа забіць у бліжэйшы час з-за маіх выступаў — як у рэальным жыцьці, так і ў сацыяльных сетках. І гэта, паўтаруся, ня жарты: яна разумны чалавек. Яна Вельмі гэтага баіцца. Яна і за Хадаркоўскага (яго яна бачыла яшчэ ды пасадкі і сябруе зь ім) з Навальным вельмі перажывае, але за іх ня так моцна, паколькі яна ўсё ж мая мама, а ня іх.
— Цікава. А вы з-за такіх вось размоваў з мамай сталі баяцца, што Пуцін можа вас у бліжэйшы час забіць асабіста або праз пасярэднікаў?
— Вы ведаеце, так... Трохі. Ня так моцна, як мама, але ўсё ж... Але ўсё ж я ня так моцна яго баюся. Калі б я баяўся вельмі моцна, то наўрад ці ўзначальваў бы апазыцыйную партыю, наўрад ці б займаўся тым, чым займаюся. Перадавайце, дарэчы, ад мяне і матулі прывітаньне Дзьмітрыю Быкаву.
— Дзякуй, перадам. Спадзяюся, ўсё ж такі здаровы сэнс пераможа і Пуцін вас не заб’е.
— Дай Бог. І я спадзяюся.
