Лінкі ўнівэрсальнага доступу

Бальцаровіч назваў унівэрсальную формулу дабрабыту


Лешак Бальцаровіч

Архітэктар польскіх эканамічных рэформаў пачатку 1990-х гадоў Лешак Бальцаровіч сёньня ў Менску агучыў сваю ўнівэрсальную формулу дабрабыту: чым больш дэмакратыі ў краіне, тым заможней жывуць у ёй людзі.

Пра гэта Лешак Бальцаровіч гаварыў у сваёй публічнай лекцыі на міжнароднай канфэрэнцыі «Праграма пераўтварэньняў для Беларусі: рэгіянальны досьвед і выклікі». Яе арганізаваў рух «За cвабоду» ў рамках кампаніі «Народная праграма». Прадстаўнікі беларускіх уладаў, хоць і былі запрошаныя на мерапрыемства, яго праігнаравалі.

Лешак Бальцаровіч згадаў такі факт: Паўночная і Паўднёвая Карэя пачыналі пасьляваеннае жыцьцё амаль у аднолькавых умовах. Сёньня эканамічны стан гэтых краінаў несувымерны. Калі ўзяць ровень жыцьця паўднёвых карэйцаў за 100%, то ў паўночных ён складае толькі 7%. У Паўднёвай Карэі людзі жывуць свабодна і заможна, у Паўночнай — амаль мільён памерлых з голаду.

Каб не давялося жыць так, як у Паўночнай Карэі, патрэбныя рэформы, — падкрэсьліў архітэктар польскіх рэформаў:

«Трэба будаваць новае. Патрэбны моцны, палітычна незалежны прыватны сэктар. Так, як гэта здолелі зрабіць у Польшчы, у іншых краінах. Для гэтага неабходныя перабудова дзяржаўнага апарату, наяўнасьць незалежных судоў і прафэсійных пракурораў. Паверце, самыя галоўныя эканамічныя рэформы — гэта палітычныя рэформы».
Пасол Вялікабрытаніі Брус Бакнэл і Лешак Бальцаровіч
Пасол Вялікабрытаніі Брус Бакнэл і Лешак Бальцаровіч

Лешак Бальцаровіч падкрэсьліў: для маштабных рэформаў неабходныя вялікія замежныя інвэстыцыі. На пачатку 90-х гадоў мінулага стагодзьдзя іх аднолькава не хапала як Польшчы, так і Беларусі. Тады дзьве краіны былі прыкладна ў аднолькавым становішчы. Але ў Польшчу грошы пайшлі. А ў Беларусь — не:

«Калі прыходзіць замежны капітал? Тады, калі ён бачыць, што ў нейкай краіне яму карысна быць, што там для яго ёсьць добрыя пэрспэктывы. Немагчыма праз голую прапаганду пераканаць уладальнікаў капіталу пайсьці на новыя рынкі».

«Ці пагадзіўся б пан Бальцаровіч кансультаваць беларускі ўрад, калі б у нашай краіне перамаглі дэмакраты?» — спыталіся ў знакамітага эканаміста, які цяпер выкладае ў Варшаўскай вышэйшай эканамічнай школе. Адказ выклікаў моцныя воплескі:

«Беларусі няма неабходнасьці ў зьнешніх кансультантах. Я ведаю шмат вельмі добрых эканамістаў у Беларусі. Ну, і адначасова я магу накіраваць да вас маіх беларускіх студэнтаў. Гэта вельмі таленавітыя і разумныя хлопцы».
Лешак Бальцаровіч
Лешак Бальцаровіч

«Мы правялі гэтую канфэрэнцыю, зразумела, не для таго, каб пачуць ад Лешака Бальцаровіча, што ў Беларусі шмат адукаваных эканамістаў, якія ўмеюць пісаць добрыя праграмы», — сказаў Свабодзе, падводзячы вынікі, кіраўнік руху «За свабоду» Аляксандар Мілінкевіч:

«Але вельмі важна ня толькі мець напісаныя працы. Вельмі важна іх папулярызаваць. І адна з самых вялікіх мэтаў гэтай канфэрэнцыі — каб людзі больш ведалі пра магчымасьці, небясьпечнасьці, паляпшэньні. Таму запрашэньне такіх знакавых людзей, як Бальцаровіч, вельмі важнае для зьмяненьня маральнага клімату. Каб людзі ў Беларусі, якія хочуць рэформаў, больш верылі ў сябе».
Аляксандар Мілінкевіч на лекцыі Лешака Бальцаровіча
Аляксандар Мілінкевіч на лекцыі Лешака Бальцаровіча

Карэспандэнт: «Як я зразумеў, улады праігнаравалі ваша запрашэньне?»

«Так. мы запрасілі прадстаўнікоў міністэрстваў эканомікі і фінансаў, Нацыянальнага банку, Акадэміі навук, дзяржаўных унівэрсытэтаў, дзе вывучаецца эканоміка. Але яны не адгукнуліся. Мне шкада. Правільна было сказана на пачатку канфэрэнцыі: гэта — агульная справа. Мы ж не зьбіраемся нападаць на сучасную ўладу ці казаць, што хтосьці дрэнны кіраўнік і ня так робіць сваю справу. Наша краіна ў небясьпецы. І там, дзе можна кансалідавацца, мы проста абавязаныя так зрабіць. Бо гэта агульная адказнасьць».

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG