Лінкі ўнівэрсальнага доступу

Лукашэнка падзяліў алімпійцаў на эліту і лузэраў


Аляксандар Лукашэнка
Аляксандар Лукашэнка

Беларускім спартоўцам засталося правесьці ў Сочы дзьве біятлённыя эстафэты і лыжны маратон — гэтыя спаборніцтвы заплянаваныя на апошнія дні Алімпіяды.

Учорашняя камбінаваная эстафэта завяршылася для беларусаў на 11-й пазыцыі — выглядае, што без Дар’і Домрачавай усе астатнія біятляністы мала на што здольныя.

Тым часам у графік вяртаньня алімпійцаў, якія ўжо скончылі выступы, унесеныя зьмены. Ад пачатку плянавалася, што каманда фрыстайлістаў прыляціць дадому ўжо сёньня, аднак, згодна з рашэньнем прэзыдэнта НАК Аляксандра Лукашэнкі, у зьвязку з выбітнымі вынікамі лыжныя акрабаты застануцца на цырымонію закрыцьця Гульняў, каб падчас заключнага параду беларускіх трыюмфатараў пабачыў увесь сьвет.

Апроч таго, Лукашэнка распарадзіўся даслаць па спартовую эліту прэзыдэнцкі «Боінг» — трохразовая алімпійская чэмпіёнка Дар’я Домрачава, алімпійскія чэмпіёны Ала Цупер і Антон Кушнір, бронзавая прызэрка Надзея Скардзіна, а таксама іх трэнэры і сэрвісмэны павінны быць дастаўленыя на радзіму ва ўмовах належнага камфорту. Усе астатнія, хто зьезьдзіў у якасьці спартовых турыстаў, як-небудзь дабяруцца на перакладных.

Пры гэтым старшыні Менгарвыканкаму Мікалаю Ладуцьку дадзенае распараджэньне годна і на вышэйшым узроўні сустрэць трыюмфатараў, расквеціць сталічныя вуліцы, уключыць сьвяточную ілюмінацыю, задзейнічаць актывістаў БРСМ, якія будуць сустракаць герояў дзяржаўнай атрыбутыкай.

Пакуль у Беларусі нагнятаецца гістэрыя «велічнасьці айчыннага спорту», алімпійцы суседняй Украіны заклапочаныя ня столькі стартамі, колькі кровапраліцьцем на радзіме. Учора з нагоды жорсткай зачысткі кіеўскага Майдану, якая вылілася ў шматлікія ахвяры, са спэцыяльнымі заявамі выступілі НАК Украіны, кіраўніцтва алімпійскай дэлегацыі, грамадзкія арганізацыі.

Выказваюць сваё стаўленьне да трагічных падзеяў і асобныя спартоўцы. Так, гарналыжніца Багдана Мацецкая і яе трэнэр Алег Мацецкі адмовіліся ад выступу на Алімпійскіх гульнях на знак пратэсту супраць захадаў прэзыдэнта Ўкраіны Віктара Януковіча:

«Мы скрайне абураныя дзеяньнямі Віктара Януковіча, які замест таго, каб вырашыць канфлікт перамовамі з Майданам, патапіў самыя апошнія надзеі ўкраінцаў у крыві, парушыўшы пры гэтым адвечны прынцып Алімпійскіх гульняў — мір падчас іх правядзеньня».

На знак салідарнасьці са змагарамі на барыкадах і на знак пратэсту супраць «бандыта-прэзыдэнта і яго халуйскага ўраду» Мацецкія спынілі свой удзел у сочынскай Алімпіядзе:

«Вечная памяць загінулым героям за Волю Ўкраіны! Слава Ўкраіне і яе Героям!» — напісала Багдана Мацецкая на сваёй старонцы ў Фэйсбуку.

На распараджэньне прэзыдэнта Януковіча 20 лютага ва Ўкраіне абвешчаная жалоба па загіблых.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG