Лінкі ўнівэрсальнага доступу

Сойм Партыі БНФ асудзіў улады Украіны за палітычны канфлікт


«Віна за паглыбленьне палітычнага канфлікту ва Ўкраіне ляжыць на цяперашнім кіраўніцтве краіны, якое насуперак чаканьням нацыі адмовілася ад эўрапейскай інтэграцыі і стала на шлях сілавога падаўленьня мірных пратэстаў і прыняцьця рэпрэсіўных законаў», — гаворыцца ў заяве Партыі БНФ, прынятай 25 студзеня на паседжаньні Сойма арганізацыі.

«Інтарэсам беларускай нацыі адпавядае свабодная Ўкраіна, незалежная ад расейскага імпэрыялізму і свабодная ў рэалізацыі праэўрапейскіх памкненьняў украінскага народу», — падкрэсьліваецца ў заяве.

Паводле Партыі БНФ, вялікай небясьпекай для Беларусі «зьяўляецца пагроза зьнішчэньня грамадзянскіх правоў і свабод ва Ўкраіне, а таксама пагроза дэзарыентацыі Ўкраіны праз умяшальніцтва замежных сіл з Усходу».

«Паводле складзенага становішча, мы маем права сьцьвярджаць, што першапрычынай глыбокага палітычнага крызісу ва Ўкраіне стала супрацьдзеяньне праэўрапейскаму выбару ўкраінскага народу, інсьпіраванае і падтрыманае Масквой з мэтай рэалізацыі яе геапалітычных інтарэсаў», — гаворыцца ў дакумэнце.

Партыя БНФ выказвае шчырыя спачуваньні ўсім, хто пацярпеў падчас сутыкненьняў у Кіеве, Чаркасах і іншых украінскіх гарадах. «Мы глыбока смуткуем па тых, хто загінуў падчас сутыкненьняў, выказваем глыбокае спачуваньне сваякам загіблых у змаганьні за свабоду. Асаблівую жалобу мы перажываем у зьвязку з гібельлю ў Кіеве беларуса Міхаіла Жызьнеўскага, мужнага сына беларускага народу і сьмелага змагара за свабоду народу ўкраінскага», — падкрэсьліваецца ў заяве.

Партыя БНФ таксама выказвае спадзяваньне, што «палітычнай эліце Ўкраіны хопіць волі і мужнасьці для вырашэньня палітычнага канфлікту мірным шляхам, празь перамовы на падставе ясна прадэмантраванага імкненьня ўкраінскай нацыі да дэмакратычнай і свабоднай Украіны ў супольнасьці свабодных народаў Эўропы».

Ваша меркаваньне

Паказаць камэнтары

XS
SM
MD
LG