Лінкі ўнівэрсальнага доступу

Андросенка: Гэта запалохваньне ЛГБТ-супольнасьці


Сяргей Андросенка
Сяргей Андросенка

У выходныя ў Менску і Віцебску міліцыя ўчыніла аблавы на клюбы, дзе зьбіраліся прадстаўнікі ЛГБТ-супольнасьці. Ні міліцыя, ні кіраўніцтва клюбаў ня бачаць у гэтым нічога надзвычайнага.

Кіраўнік праваабарончага праекту «Гей-Беларусь» Cяргей Андросенка апавёў, што 11 студзеня ў клюбе «6А» была звычайная забаўляльная ЛГБТ-вечарынка, прычым не плянавалася праводзіць ніякіх грамадзкіх акцый. Але ў клюб уварваліся міліцыянты і людзі ў цывільным і пачалі ўсіх перапісваць — маўляў, з калёніі ўцёк злачынца, і яго шукаюць. Нават фатаробат паказалі:

«Ім спатрэбілася, каб знайсьці гэтага злачынцу, перапісаць зьвесткі ўсіх наведнікаў вечарыны — а гэта 100 чалавек. Перапісвалі прозьвішча, імя, імя па бацьку, месца працы, прапіску. У мяне пацікавіліся нумарам тэлефона і нават спраўдзілі, ці не схлусіў я. Вядома, усіх гэта вельмі ўразіла. Але ў СМІ мы не зьвярталіся, ці мала што здараецца».

Але на наступны дзень гісторыя паўтарылася ў Віцебску, у клюбе «ХХІ век». Мясцовая філія ЛГБТ-супольнасьці праводзіла «Гішпанскую навагоднюю вечарынку». Міліцыянты хвілін 40 аглядалі ўсіх на ўваходзе, а потым уварваліся ў клюб:

«Выстраілі ўздоўж сьцен — з аднаго боку хлопцаў, з другога — дзяўчат. Да хлопцаў ставіліся больш груба, штурхалі, паводзілі сябе некарэктна. На камэру трэба было казаць месца працы, месца вучобы. У нас заўсёды такая праблема ў рэгіёнах, што людзі хаваюць сваю сэксуальную арыентацыю, ім страшна нават прыйсьці на такія забаўляльныя ЛГБТ-вечары, каб іх раптам ня ўбачылі, не паказвалі ў горадзе пальцам, што ён гей ці лесьбіянка. І гэты эпізод мы разглядаем як акт запалохваньня».
Людзі хаваюць сваю сэксуальную арыентацыю, ім страшна нават прыйсьці на такія забаўляльныя ЛГБТ-вечары, каб іх раптам ня ўбачылі, не паказвалі ў горадзе пальцам, што ён гей ці лесьбіянка

Актывістка Натальля Манькоўская кажа:

«Некалькі чалавек дакладна будуць падаваць скаргі на дзеяньні міліцыянтаў, якія паводзілі сябе дастаткова груба».

І віцебская, і менская міліцыя сьцьвярджаюць, што ў клюбах была звычайная праверка.

Кіраўніцтва абодвух клюбаў распавядае пра тыя падзеі неахвотна. Вось што паведаміў адміністратар сталічнага клюбу «6А»:

«Проста міліцыя часам прыходзіць праверыць, ці ёсьць у клюбах непаўналетнія. Людзей правяралі. Але там жа нікога не забралі. Нікога не знайшлі і сышлі».

Адміністратарка віцебскага клюбу «ХХІ век» кажа:

«Да нас заўсёды ўначы і патрулька, і АМАП заходзяць. Але я не магу сказаць, што быў інцыдэнт. Заходзілі, глядзелі, канфліктаў не было і нічога надзвычайнага не было. І нікога не затрымлівалі».

Сяргея Андросенку рэакцыя кіраўніцтва клюбаў не зьдзівіла:

«Пазыцыя клюбаў у гэтым выпадку зразумелая: клюбы — гэта бізнэс. Супрацоўнікі клюбаў казалі, што, канечне, да іх прыходзяць з праверкамі, правяралі, ці ёсьць непаўналетнія. Але такога, каб здымалі ўсіх на камэру і шыхтавалі да сьценак — такога не было. Канечне, клюбы ня хочуць псаваць адносіны зь мясцовымі ўладамі. Я думаю, калі б гэта ня тычылася грамадзкіх арганізацый, там не было актывістаў так шмат, пра гэта магчыма, і ня стала б вядома».

Сяргеем Андросенкам у панядзелак зацікавіліся праваахоўныя органы:

«Мне зараз распавялі суседзі, што сёньня прыходзіла міліцыянтка, цікавілася, хто жыве ў кватэры, дзе я жыву, хто да мяне прыходзіць».

Сяргей Андросенка распавёў, што два тыдні таму яны ўжо трэці раз падалі дакумэнты на рэгістрацыю Рэспубліканскага моладзевага праваабарончага аб’яднаньня. Рашэньня пакуль няма.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG