Лінкі ўнівэрсальнага доступу

Камітэт ААН стаў на бок актывісткі з Гомелю


Марыся Тульжанкова

Грамадзкая актывістка з Гомелю Марыся Тульжанкова атрымала адказ з Камітэту ААН па правах чалавека. Камітэт устанавіў, што правы Тульжанковай, прадугледжаныя артыкулам 19 Міжнароднага пакту аб грамадзянскіх і палітычных правах, былі парушаныя дзяржавай.



«Для мяне гэта вельмі нечакана. Мне здавалася, што мая драбнаватая справа ў шэрагу іншых спраў у Беларусі ня вартая такой увагі з боку ўплывовай міжнароднай структуры. Мы як бы ўжо прызвычаіліся да пастаяннага парушэньня сваіх правоў. Але гэты ліст ад Камітэту ААН мяне ўсьцешыў, дадаў настрою. Усё ж такі нас не пакідаюць сам на сам з нашымі праблемамі — мы й на міжнародным узроўні можам адстойваць свае правы».

У сакавіку 2008 году пасьля канцэрту гурта N.R.M. у Гомельскім грамадзка-культурным цэнтры Марыся раздала мінакам віншавальныя паштоўкі з Днём Волі і запрашэньнем узяць удзел 25 сакавіка ў сьвяткаваньні гэтай памятнай даты ў Менску.

Тульжанкову схапілі невядомыя ў цывільным, адвезьлі ў міліцыю, абшукалі, а пасьля даставілі ў ізалятар часовага ўтрыманьня. Марыся да суду правяла двое сутак у ізалятары, а пасьля суд Цэнтральнага раёну прызнаў яе вінаватай у парушэньні закону пра масавыя мерапрыемствы і пакараў штрафам у 350 тысяч рублёў (на той момант — 162 даляры). Скаргі Марысі ў абласны і Вярхоўны суды ня мелі плёну.

Гомельскі «Цэнтар стратэгічнай цяжбы» дапамог Тульжанковай падрыхтаваць зварот у Камітэт ААН па правах чалавека. Прайшло амаль тры гады перш як зварот быў разгледжаны.
Нацыянальны закон пра масавыя мерапрыемствы ня толькі не адпавядае міжнародным абавязкам нашай краіны, але й груба топча правы й свабоды...

Леанід Судаленка, кіраўнік «Цэнтру стратэгічнай цяжбы»: «Рашэньне Камітэту ААН ў дачыненьні да Тульжанковай пацьвярджае той факт, што нацыянальны закон пра масавыя мерапрыемствы ня толькі не адпавядае міжнародным абавязкам нашай краіны, але й груба топча правы й свабоды кожнага грамадзяніна Беларусі на мірныя сходы, на атрыманьне й вольны распаўсюд інфармацыі».

Паводле Камітэту ААН па правах чалавека, беларускія ўлады павінны апублікаваць рашэньне, прывесьці нацыянальнае заканадаўства ў адпаведнасьць з падпісаным Міжнародным пактам аб грамадзянскіх і палітычных правах і забясьпечыць Тульжанковай кампэнсацыю нанесенай матэрыяльнай шкоды.

У прыватным меркаваньні адзін з чальцоў Камітэту ААН выказаўся й за вызначэньне канкрэтнага памеру кампэнсацыі маральнай шкоды, якую ўрад мусіў бы сплаціць Марысі Тульжанковай. Справа маладой дзяўчыны — сёмая па ліку з Гомелю, на якую станоўча адрэагаваў Камітэт ААН па правах чалавека. Усяго ў гэтую міжнародную структуру з рэгіёну пададзена звыш паўсотні скаргаў грамадзянаў. На 32 зь іх атрыманы адказ, што яны прыняты да разгляду.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG