Лінкі ўнівэрсальнага доступу

Адмена ліцэнзій: крок наперад — два назад


1 верасьня Аляксандар Лукашэнка падпісаў указ «Аб ліцэнзаваньні асобных відаў дзейнасьці», якім былі адмененыя ліцэнзіі ў шэрагу накірункаў прадпрымальніцкай дзейнасьці. Паводле афіцыйнага абгрунтаваньня, указ мае на мэце лібэралізацыю ўмоў эканамічнай дзейнасьці. Незалежныя прадпрымальнікі і эканамісты заяўляюць, што указ ёсьць залагоджваньнем прадпрымальнікаў напярэдадні прэзыдэнцкіх выбараў.

У адпаведнасьці з указам, з 1 студзеня адмяняюцца ліцэнзіі на 16 відаў дзейнасьці. Сярод іншых адной з найважнейшых прадпрымальнікі называюць адмену ліцэнзій на розьнічны гандаль. Прадстаўнікі дробнага бізнэсу чакалі гэтага дакумэнту некалькі гадоў, кажа прадпрымальнік Аляксандр Макаеў:

Аляксандр Макаеў
«За атрыманьне ліцэнзіі на розьнічны гандаль людзі плацілі па 90 эўра. Вось гэтую суму прадпрымальнікі зараз зэканомяць, зэканомяць таксама час. Гэтая палёгка, пра якую Лукашэнка, Мінэканомікі і Міністэрства па падатках і зборах заявілі, што праз гэта яны ўвойдуць у шэраг краін, лепшых у спрыяньні дробнаму бізнэсу. Паглядзім».

Скасаваньне ліцэнзаваньня ў шэрагу кірункаў дзейнасьці прадпрымальнікі называюць чаканым і станоўчым крокам з боку ўлады. Які, аднак, зроблены несвоечасова і не дае істотнага штуршка для разьвіцьця прадпрымальніцтва, кажа кіраўнік кампаніі «За свабоднае разьвіцьцё прадпрымальніцтва» Віктар Гарбачоў:

Віктар Гарбачоў
«Асноўная частка, 85% прадпрымальнікаў, якія задзейнічаныя ў гэтых галінах, яны ўжо набылі і аплацілі гэтыя ліцэнзіі на бліжэйшыя пяць гадоў. А зараз яны выбралі 16 відаў дзейнасьці, па якіх усё аплачана, і сьмела іх адмянілі. А астатнія, іншыя віды дзейнасьці, яны пакінулі — плаціце і надалей. І гэта зноў спроба падзяліць прадпрымальнікаў на нейкія катэгорыі. Таму гэта звычайная гульня перад выбарамі. Адбываецца заігрываньне з электаратам, а зараз і з прадпрымальнікамі. Істотнага зруху ў разьвіцьці прадпрымальніцтва гэта ня дасьць. Гэта крок наперад, але, як казаў таварыш Ленін, і два крокі назад».

Яраслаў Раманчук
Таго меркаваньня, што эканамічныя захады ўлады перадусім маюць палітычную матывацыю, таксама прытрымліваецца вядомы эканаміст і палітык, кандыдат на ўдзел у прэзыдэнцкіх выбарах Яраслаў Раманчук. У прыватнасьці, застаецца абавязковым для ліцэнзаваньня паліграфічная, выдавецкая, адукацыйная , адвакацкая дзейнасьць, аздараўленьне дзяцей за мяжой.

Яраслаў Раманчук: «Гэта, безумоўна, частка прэзыдэнцкай кампаніі спадара Лукашэнкі. І тое, што пад ліцэнзіяй засталіся такія віды дзейнасьці, як друкарская дзейнасьць, сьведчыць, што ўлады не жадаюць здымаць кантроль за распаўсюдам інфармацыі перад выбарамі. Што дзяржава — гэта ня толькі эканоміка, але таксама ідэалёгія, прапаганда, дзяржаўная інфармацыйная палітыка. Акрамя таго, паміж ліцэнзіяў існуюць розныя спосабы кантролю за бізнэсам, таму так, палягчэла, але трэба кардынальна мяняць сыстэму».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG