Лінкі ўнівэрсальнага доступу

Як будуць галасаваць "пад перакрэсьленым крыжам"?


Палітычны выбар — гэта свабоднае волевыяўленьне грамадзяніна.

Безумоўна, я чую выразнае і яхіднае "гы-гы-гы".

Дый сам я бязгучна сьмяюся "гы-гы-гы" над гэтым, што напісаў, хоць мне выбіраць — не паміж Лукашэнкам і адзіным дэмакратычным, а ўсяго паміж Браніславам Камароўскім і Яраславам Качынскім.

"Лічыцца кожны голас"


Учора я сказаў жонцы, што, відаць, не пайду галасаваць, бо як Камароўскі, так і Качынскі — людзі мінулай эпохі, а Польшча заслугоўвае на прэзыдэнта з больш мадэрным сьветапоглядам, чым гэтыя два. Абрыдлі мне гэтыя старэчы, так бы мовіць.

— Лічыцца кожны голас. Калі ня пойдзеш і не прагаласуеш за Камароўскага, я з табой разьвядуся, — сказала мне жонка. І, бачачы, што я ня надта цямлю, што насамрэч значыць гэты аргумэнт, паясьніла: — Варыць есьці будзеш сам. І прасаваць кашулі таксама.

Гэта і вырашыла.

Ад сям’і Максімюкоў у Празе Камароўскі атрымае максымум: чатыры галасы. Акрамя мяне і жонкі, за яго яшчэ прагаласуюць два нашы паўналетнія сыны. Малодшы жыве разам з намі, і лёс ягонага страўніка залежыць ад таго самага гаршка, што і мой (праўда, кашулі ён прасуе сабе сам). Старэйшы прыехаў да нас у адпачынак з Даніі, і жонка адразу зарэгістравала яго ў польскай амбасадзе ў Празе на галасаваньне 4 ліпеня.

Калі я званіў перад першым турам прэзыдэнцкіх выбараў маме ў Беласток, дык яна ў мяне таксама пыталася, ці пайду я на выбары і за каго прагаласую. Я ёй сказаў, што з усіх кандыдатаў мне найбольш адпавядае 35-гадовы сацыял-дэмакрат Гжэгаж Напяральскі, але ён, па-сутнасьці, посткамуніст, а я ж не магу галасаваць супраць свайго генэтычнага коду, у якім і яна, і бацька надзялілі мяне антыкамуністычнай камбінацыяй азоцістых асноваў дэзаксырыбануклеінавай кіслаты. А таму, падсумаваў я, у мяне няма ахвоты ісьці на выбары.

— За Напяральскага няма сэнсу галасаваць, ён ня выйграе. Гэта змарнаваны голас, — растлумачыла мне мама. — Ідзі і галасуй за Камароўскага. Лічыцца кожны голас. Бо як выйграе Качынскі, то сам ведаеш, што будзе...

Я ня стаў удакладняць у мамы, што будзе, калі выйграе Качынскі. Ёй 78 гадоў, але яна ўсё яшчэ баіцца выйгрышу Качынскага. Дык што казаць мне — я пражыў усяго 52 гады.

Што яшчэ?


Калі хто не зразумеў, дык яму расшыфроўка: Беластоцкія беларусы будуць галасаваць амаль выключна за Камароўскага. Гэта як нейкі генэтычны нацыянальны код — усе мы аўтаматычна ведаем, за каго нам трэба галасаваць, а за каго ня трэба. Зь якім прэзыдэнтам, так бы мовіць, нам можна ўжыцца, а зь якім — ня надта. І наогул ня важна, якія ў іх эканамічныя праграмы і колькі дармовай кашы яны абяцаюць народу пасьля выбараў. Важна, як яны глядзяць на нас, недарэзаных схізматыкаў, так бы мовіць...

Мы маглі б быць і "добрымі палякамі"


Учора Яраслаў Качынскі выступаў на выбарчым мітынгу ў Беластоку. На Беласточчыне ў першым туры ён выразна выйграў у Камароўскага. Там моцны каталіцкі электарат, і ён галасуе заўсёды за "моцных католікаў". Ніякі лібэрал, ня кажучы пра посткамуніста, ня мае шанцаў на выйгрыш на Беласточчыне — акрамя гайнаўскага павету, дзе пераважае праваслаўнае беларускае насельніцтва, якое заўсёды галасуе інакш, чым уся астатняя Беласточчына. І яшчэ літоўцы ў адной гміне на поўначы ваяводзтва, хоць і католікі, часта галасуюць як праваслаўныя беларусы. Гэтым разам было падобна — у гміне Пуньск, дзе літоўцы пераважаюць над палякамі, выйграў Камароўскі.

Качынскі на беластоцкім мітынгу згадаў і нас грэшных:

"Тут жывуць католікі, праваслаўныя, а нават татары. Дый сынагогі можна тут знайсьці. Падляшша — рэгіён, які паказвае, што добрымі палякамі можна быць і пад звычайным крыжам, і пад гэтым перакрэсьленым".

Ня ведаю, хто яму падказаў такую фармулёўку, але гэта быў страшны пракол. Мая жонка, калі пачула пра "добрых палякаў пад перакрэсьленым крыжам", спачатку хацела шпурнуць пультам кіраваньня ў тэлевізар, але ў апошні момант перадумала і замест гэтага пераслала мне зьнішчальны пагляд з маўклівым мэсыджам: "І ты яшчэ ня хочаш галасаваць за Камароўскага!"

Царква прамовіла


На Беласточчыну па галасы праваслаўных прыяжджаў і Камароўскі. Было гэта ў траўні, з нагоды фэстывалю царкоўнай музыкі ў Гайнаўцы. Камароўскі быў на гэтым фэстывалі разам з сацыял-дэмакратам Напяральскім.

"Тут — малая Эўропа. Разнастайнасьць культураў, спадчына шматвяковай гісторыі Польшчы. Суіснаваньне ў радасьці і ў горы," — сказаў Камароўскі ў Гайнаўцы. І згадаў праваслаўнага духоўніка, палкоўніка, расстралянага саветамі ў 1940 у Катыні, чые тры сыны таксама загінулі, змагаючыся за Польшчу супраць немцаў.

Адчуйце розьніцу, як той казаў.

"Нам трэба шанаваць нашу разнастайную спадчыну," — сказаў у Гайнаўцы і Напяральскі.

Але мітрапаліт Польскай аўтакефальнай праваслаўнай царквы, архіяпіскап Сава, унёс тады яснасьць у справу, як трэба галасаваць праваслаўным:

"Мы жадаем, каб Бог блаславіў вас ва ўсіх пачынах," — сказаў мітрапаліт, зьвяртаючыся перад сьціжмай журналісцкіх мікрафонаў да Браніслава Камароўскага.

Амін.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG