Падчас сустрэчы з кіраўніком Расеі Ўладзімірам Пуціным прэзыдэнт Казахстану Касым-Жамарт Такаеў прапанаваў замарозіць вайну ва Ўкраіне.
Аб гэтым ён заявіў падчас XXII Форуму міжрэгіянальнага супрацоўніцтва Казахстана і Расеі ў Омску.
«Усё гэта трэба спыняць. Паколькі тое, што адбываецца, на мой перакананы погляд, гэта на руку і ў радасьць супернікам. І Расеі, і ўкраінскай дзяржавы», — заявіў ён.
Прэзыдэнт Казахстану заявіў, што яму «паступае шмат сыгналаў з Эўропы і ЗША па канфлікце Расеі і Ўкраіны».
Ён таксама зазначыў, што прырода гэтага канфлікту не зусім зразумелая для многіх.
«Мы заўсёды з павагай ставіліся да ўкраінскага народу. Прырода гэтага канфлікту не зусім зразумелая для многіх, у тым ліку для нас. Я ведаю, вы праявілі максымум дыпляматычнай гнуткасьці на Алясцы.
Маё сьціплае меркаваньне. Можа, канфлікт ужо варта замарозіць і вярнуцца да Стамбульскіх дамоўленасьцей 2.0. Вядома, пад гарантыяй вялікіх дзяржаў накшталт ЗША. Я катэгарычна адмаўляюся быць пасярэднікам», — сказаў Такаеў.
У адказ Пуцін паабяцаў у дэталях паінфармаваць Такаева «аб ходзе спраў на ўкраінскім напрамку».
Днямі дзяржаўны сакратар ЗША Марка Рубіё сказаў кіраўніку МЗС Расеі Сяргею Лаўрову пра «неабходнасьць спыненьня вайны паміж Расеяй і Ўкраінай».
Крэмль заявіў, што апошнія ўкраінскія ўдары па Расеі «не набліжаюць асабістыя кантакты» паміж расейскім кіраўніком Уладзімірам Пуціным і прэзыдэнтам Украіны Уладзімірам Зяленскім.
Пазыцыя Ўкраіны
Украіна неаднаразова падкрэсьлівала, што перамовы ў Стамбуле 2022 года ня могуць быць асновай для мірнага ўрэгуляваньня, бо прапанаваныя ў той час умовы ўключалі значныя абмежаваньні сувэрэнітэту Ўкраіны і не гарантавалі бясьпеку дзяржавы, піша Ўкраінская служба Радыё Свабода. Кіеў настойвае, што любыя перамовы павінны грунтавацца на павазе да тэрытарыяльнай цэласнасьці Ўкраіны і міжнароднага права.
Апошнія перамовы паміж Украінай і Расеяй, арганізаваныя пры пасярэдніцтве ЗША, адбыліся ў лютым. Расея пры гэтым адмовілася ад прапановы аб з боку ЗША і Ўкраіны аб спыненьні агню і спрабуе захапіць усю тэрыторыю ўкраінскага Данбасу. З-за абвастрэньня сытуацыі на Блізкім Усходзе трохбаковыя перамовы былі адкладзеныя на нявызначаны тэрмін.
Нядаўна прэзыдэнт ЗША Дональд Трамп заявіў, што заканчэньне канфлікту ЗША з Іранам дазволіць Вашынгтону засяродзіцца на ўрэгуляваньні расейска-ўкраінскай вайны.
Уладзімір Зяленскі гядаўна падкрэсьліў, што Ўкраіна хоча скончыць вайну да зімы:
«Праз дыпляматыю, і, вядома, гэта вельмі важна — і праз ціск на Расею».
ГЛЯДЗІЦЕ ТАКСАМА:
Рубіё на Філіпінах гаварыў з Лаўровым аб неабходнасьці спыніць вайну Расеі ва ЎкраінеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.