Фільм «Спадар Ніхто супраць Пуціна» пра маладога расейскага настаўніка, які ціха супраціўляецца вайне Крамля супраць Украіны, 15 сакавіка атрымаў «Оскар» за найлепшы дакумэнтальны фільм, піша Радыё Свабодная Эўропа / Радыё Свабода.
Фільм зьнялі рэжысэр Дэйвід Барэнштэйн і расейскі настаўнік Павел Таланкін, які, уласна, і ёсьць галоўным героем стужкі, якая расказвае пра ягоную працу ў школе ў бедным шахтарскім мястэчку Карабаш на Ўрале.
Your browser doesn’t support HTML5
Russia Asked A Teacher To Film Pro-War Propaganda. He Made An Oscar-winning Documentary Instead
У фільме выкарыстоўваюцца матэрыялы, зьнятыя Таланкіным за два гады, каб паказаць, як урад прэзыдэнта Ўладзіміра Пуціна навязвае вучням праваенную прапаганду.
З ініцыятывы Міністэрства адукацыі Расеі 35-гадовы Таланкін дапамагаў здымаць прапаганду ў падтрымку вайны ў пачатковай школе ў Карабашы. Але чыноўнікі міністэрства не падазравалі, што ён ператворыць свае відэа ў дакумэнтальны фільм пра расейскую кампанію аб «патрыятычнай адукацыі» школьнікаў.
У фільме, які выданьне The Hollywood Reporter назвала «кранальнай, інтымнай хронікай», Таланкін задакумэнтаваў і свой уласны перасьлед і канчатковае выгнаньне.
«„Містэр Ніхто супраць Пуціна“ — гэта фільм пра тое, як вы траціце сваю краіну, і тое, што мы ўбачылі, працуючы з гэтымі відэаматэрыяламі, — гэта тое, што вы траціце яе празь незьлічоныя маленькія, нязначныя акты саўдзелу», — сказаў рэжысэр Барэнштэйн, стоячы на сцэне разам з Таланкіным.
«Гэта нерэальна»
Перад цырымоніяй у Лос-Анджэлесе Таланкін сказаў: «Калі б вы сказалі мне два гады таму, што ўсё будзе так, я б засьмяяўся вам у вочы».
«Гэта нерэальна — такіх рэчаў проста не бывае».
Таланкін уцёк з Расеі летам 2024 году зь цьвёрдымі дыскамі, на якіх і былі відэазапісы, што пазьней увайшлі ў дакумэнтальны фільм.
Таланкін пазнаёміўся з Барэнштэйнам у інтэрнэце, сказаў ён CBS, і здымаў два гады, пакуль Барэнштэйн дыстанцыйна, з Эўропы, рэжысаваў фільм .
Сёлета ў лютым фільм атрымаў прэмію Брытанскай кінаакадэміі ў Лёндане за найлепшы дакумэнтальны фільм.
Іншыя ляўрэаты «Оскара»
Найлепшы мастацкі фільм — стужка «Бітва за бітвай». Гэты ж фільм стаў ляўрэатам у намінацыях за найлепшую рэжысуру, найлепшую мужчынскую ролю другога пляну, найлепшы адаптаваны сцэнар, кастынг, мантаж;
Фільм «Грэшнікі» — у намінацыях за найлепшы арыгінальны сцэнар, за найлепшую мужчынскую ролю;
Фільм «Гамнэт» (гісторыя, што натхніла Шэксьпіра на „Гамлета“) стаў ляўрэатам у намінацыі за найлепшую жаночую ролю;
Фільм «Зброя» — у намінацыі за найлепшую жаночую ролю другога пляну;
Мультфільм «Кейпоп-паляўнічыя на дэманаў» — у намінацыі за найлепшы анімацыйны поўнамэтражны фільм;
Фільм «Сантымэнтальная каштоўнасьць» — у намінацыі за найлепшы фільм на іншаземнай мове.
ГЛЯДЗІЦЕ ТАКСАМА: 15 сакавіка ў Лос-Анджэлесе ўручаць «Оскары»: хто галоўныя фаварытыПаводле публікацый Current Time, Reuters і AFP.